• Өнөөдөр 2024-03-19

Лионель Месси долоо дахь “Алтан бөмбөг”-өө хүртэж, түүхэн дээд амжилт тогтоолоо

2021-11-30,   415

Оны шилдэг хөл бөмбөгч шалгаруулах “Алтан бөмбөг” шагнал гардуулах ёслол Франц Улсын нийслэл Парис хотын Шателет театрт боллоо.

2021 оны хамгийн шилдэг хөл бөмбөгчөөр “Парис Сент-Жермен” клуб болон Аргентины шигшээ багийн довтлогч Лионель Месси шалгарч, “Алтан бөмбөг”-ийн шагналыг долоо дахь удаагаа хүртсэн байна. Ингэснээр Лионель Месси “Алтан бөмбөг” шагналыг хамгийн олон удаа хүртсэн хөл бөмбөгч болж, түүхэн дээд амжилт тогтоогоод байгаа юм.

Өдгөө 34 настай Лионель Месси энэ онд Испанийн “Барселона” клубын төлөө 28, Францын “Парис Сент-Жермен” клубын төлөө дөрөв, Аргентины шигшээ багийн төлөө найман гоол оруулж, “Копа Америк”-т түрүүлэхэд өндөр хувь нэмэр оруулсан нь энэ оны шилдгээр нэрлэгдэхэд нөлөөлсөн аж.

 

Лионель Месси өмнө нь 2009, 2010, 2011, 2012, 2015, 2019 онуудад оны шилдэг хөл бөмбөгчийн “Алтан бөмбөг” шагналыг хүртэж байсан.

Харин долоо дахь удаагаа хүртэж, түүхэн дээд амжилт тогтоосон талаараа Лионель Месси “Энд дахин ирэх сайхан байна. Хоёр жилийн өмнө энэ тайзан дээр гарахдаа “Миний хамгийн сүүлчийнх” гэж бодож байлаа. Харин одоо таарсан хүн бүр л намайг хэзээ тэтгэвэртээ гарахыг асууж эхэлсэн ч, Парист ирсэндээ маш их баяртай байна.

           “Копа-Америк”-ийн аварга болж, ард түмэнтэйгээ баяраа тэмдэглэсэн онцгой жил байлаа. Би маш олон жилийн замналтай. Энэ жил ямраар дурсагдаж үлдэхийг мэдэхгүй юм. Гэхдээ энэ жил хүнд, хэцүү цаг үе, асар их шүүмжлэлийн дараа Аргентины шигшээ багтайгаа аваргалсан онцгой жил байлаа” хэмээжээ.

 

Францын нийслэл Парис хотын Шателет театрт болсон энэ удаагийн “Алтан бөмбөг” шагнал гардуулах ёслолыг нэрт хөл бөмбөгч Дидеь Дрогба хөтөлсөн бөгөөд 2021 оны “Алтан бөмбөг” шагналд дэлхийн өнцөг булан бүр дэх 180 сэтгүүлчийн санал хураасан байна.

           2021 оны “Алтан бөмбөг”-ийн шилдгийн жагсаалтыг Лионель Месси тэргүүлж, “Алтан бөмбөг” хүртсэн бол хоёрдугаар байранд “Байерн Мюнхен” клуб болон Польшийн шигшээ багийн довтлогч Роберт Левандовски, гуравдугаарт “Челси” клуб болон Италийн шигшээ багийн хагас хамгаалагч Жоржиньо, дөрөвдүгээр байранд “Реал Мадрид” клуб болон Францын шигшээ багийн довтлогч Карим Бензема жагсжээ.

 

 


Лионель Месси долоо дахь “Алтан бөмбөг”-өө хүртэж, түүхэн дээд амжилт тогтоолоо
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188