-ИРЭЭДҮЙ АЙСУЙ-

       Нишия Момижи энэ жилд Ром хотод болсон скейтбординг буюу дугуйт тэшүүрийн спортын дэлхийн аварга шалгаруулах тэмцээнээс мөнгөн медаль хүртэж, зуны олимпын наадамд оролцох эрхээ авч байлаа. Түүнийг харсан энэ спортыг сонирхогчид “Нишия ур чадвараасаа гадна заль, мэх сайтай” гэх. Дугуйт тэшүүрээр гулгах спортод заль, мэх ч хэрэг болдог аж. Нишия Момижи өдгөө дөнгөж 13 настай.

       Энэ жилийн “Токио-2020” зуны олимпын XXXII их наадмыг чимж байгаа зүйл нь шинэ спортын төрлүүдээсээ гадна түүнийг даган орж, ирж буй шинэ үеийн хүүхэд, залуус. Хүн төрөлхтний эв найрамдлын бэлгэ тэмдэг болсон энэ наадамд хүүхэд, залуус олноор оролцох болсныг сайшааж байсан ч хэн ч түүнийг 13 насандаа олимпын аварга болно гэж төсөөлөөгүй биз ээ. Өнгөрсөн даваа гарагт “Токио-2020” зуны олимпын наадмын эмэгтэйчүүдийн дугуйт тэшүүрээр гулгах тэмцээн болж өндөрлөсөн. Уг тэмцээнд 13-хан настай Японы шигшээ багийн тамирчин Нишия Момижи гурван үзүүлбэрээр нийт 15.26 оноо цуглуулж, алтан медаль хүртсэн юм. Тэрбээр Япон Улсын түүхэн дэх хамгийн залуу олимпын аварга болсон билээ.

НИШИЯ МОМИЖИ: 2024 онд Парист зохион байгуулах зуны олимпод ч гэсэн түрүүлэхийг хүсэж байна

          Уншигч та бүхэнд “Токио-2020” зуны олимпын наадмын чимэг болж чадсан 13 настай Нишия Момижиг энэ удаагийн онцлох тамирчнаар танилцуулж, түүний олимпын наадмын алтан медалиа хүртсэнийхээ дараа өгсөн бяцхан ярилцлагыг хөрвүүлэн хүргэж байна.

-13 насандаа олимпын наадамд түрүүлж, эх орондоо түүх бүтээсэнд баяр хүргэе. Баярын сэтгэгдлээсээ хуваалцахгүй юу?

-Баярлалаа. Эх орныхоо түүхэн дэх хамгийн залуу олимпын аварга болж, анх орсон олимпын наадамдаа түрүүлсэн дээ үнэхээр их баяртай байна. Зуны олимпын наадамд оролцож, түрүүлэх бол миний мөрөөдөл байсан. Харин мөрөөдөлдөө хүрч чадлаа. Би олимпын наадмын тайзан дээр хамгийн хөгжилтэй, эрх чөлөөтэйгөөрөө байлаа. Одоо л өөрийгөө маш их аз жаргалтай байгааг мэдэрч байна. Цаашид илүү олон олимпын наадамд оролцохыг хүсэж байна.

-Анх яагаад дугуйт тэшүүрээр гулгах спортоор хичээллэх болсон юм бэ?

-Аав минь намайг хичээллүүлж, өдий зэрэгтэй, энэ тавцанд ирэхэд маш их тусалсан. Надад бүхнээ зориулж, бүх чадлаа дайчилсан. Би ганцхан өөрийнхөө бус аавынхаа ч мөрөөдлийг биелүүлж чадсан.

-Зуны олимпын их наадмын тайзан дээр анх гарахад ямар санагдаж байв. Их сандарсан уу?

-Эхний үедээ үнэхээр их сандарч байсан. Харин дараа дараагийн үеүдэд сандрах маань гайгүй болж, өөрийгөө төвлөрүүлж, бүрэн хүчээ дайчилж чадсан юм болов уу.

-Скейтбординг буюу дугуйт тэшүүрээр гулгах спортоор дамжуулж хүмүүс юу хэлж, илэрхийлэхийг зорьдог юм бэ?

-Тэшүүрээр гулгах үнэхээр зугаатай, хөгжилтэй. Энэ төрлийн спортыг туршиж үзвэл үнэхээр сайхан байж, аз жаргалтай болох болно. Тийм ч учраас би хүн бүрийг тэшүүрээр гулгах спортын төрлөөр хичээллэж үзээсэй гэж боддог юм. Харин миний хувьд энэ спортоо хийхдээ аз жаргалтай байж, үзэгчдэд хөгжилтэй харагдаж, тэр хүмүүс аз жаргалыг бэлэглэе гэж боддог.

-Ирээдүйд юуг зорих вэ. Мөрөөдлөө биелүүлчихлээ. Харин үүнээсээ цааш илүү хүссэн зүйл бий юу?

-Би дэлхийн бүх хүмүүс мэддэг алдартай тамирчин болмоор байна. Мөн 2024 онд Парист болох зуны олимпод ч гэсэн түрүүлэхийг хүсэж байна.