Яруу найрагч Б.Ууганбаяр хоёр дахь шүлгийн түүвэр "Давс хийгээд усны шүлгүүд" -ээ хэвлүүлжээ

2026-09-14, 557

Яруу найрагч Б.Ууганбаяр "Давс хийгээд усны тухай шүлгүүд" нэртэй хоёр дахь шүлгийн түүврээ хэвлэжээ. Тэрбээр 2016 онд "Хүн оддын бясалгал" нэртэй шүлгийн анхны номоо гаргаж байсан юм. Ингээд уншигч танд шинэхэн түүврийнх нь зарим шүлгээс хүргэж байна.

***

Үдэш бүр харанхуй хонгил намайг угтана.

Үймээнт хөршүүдийн цовоо дуу

Үнэндээ надад шарх л нэмнэ.

Шатаар дээш өгсөхдөө түлхүүрээ халааснаасаа эрсээр

Сая хаалганыхаа дэргэд очино.

Харанхуйн гүнд түлхүүр минь цоожны нүхээ олж ядна.

Харалган сохорын зангаар хэдэн хурууд минь тэмтчисээр

Хачин тод дуугаар түгхийн онгойно.

Ахиад л "харанхуй" ихэмсэг гэгч нь угтана.

Гутлаа тайлангаа гэрлээ асаана.

Гуниг гэдэг нь гэрэлтэйд ч орших юм.

Орон дээр хураагаагүй хөнжил дэвсгэр

Орооцолдон хэвтэх могой шиг мушгирна.

Одоо энд хүрвээс хүйтэн хоосон

Одоо энд хүрвээс чийглэг хайрслаг…

Хананы цаанаас хөршүүдийн дуу хадна.

Заримдаа уйлах нь, дуулах нь заримдаа инээх нь, заримдаа хурьцах нь, заримдаа чимээгүй байх нь

Залуу тэгээд халуун, алдаргүй яруу найрагчид бол зол юм даа.

Бүх гараг эрхис од гарагсийнхаа дунд орь ганцаар төрж, мөхөж байна

Бүх хүмүүс хүмүүсийнхээ дунд орь ганцаар л ирж буцаж байна

Бүгд өөрийн жамаар дүүрэн ганцхан, хоосон ганцхан оршино

Бүдэгхэн тэгээд эцсийн дуу чихэнд түгэхэд бүх хүлээснээс ангижиран

Бүр алсыг бид ганцаар л зорино доо.

***

Дэргэд нь байсан ч санадаг байлаа

Дэндүү их, дэндүү их хайртай байлаа

Дэргэд нь байсан ч санах нь

Дэндүү хайртайгаа үргэлж хэлэх нь энгийн л нэгэн үг хэдий ч

Энгийн нэгэн үг биш юм шиг л хэлдэг байлаа

Харц чинь сарнаас ч гунигтай нууцлаг

Хайртай гэж хэлэх чинь нарнаас ч халуун бас гэрэлтэй байлаа

Дэргэд минь зүгээр л чимээгүй амьсгалах чинь

Дэн дунхан зүүдэн дундах ээжийн бүүвэй шиг зөөлөн байлаа

Буй оршихуйгаар нь чамайг хүсдэг байлаа

Буй оршихуйгаараа би гэрэлтдэг байлаа

Чиний нэр миний бичих шүлэг шиг байлаа.

Чи өөрөө миний гэр байлаа.

***

Үхэх өдрөөс бусад өдрүүд

Үнэндээ л уй гуниг.

Үхсэн өдрийн дараах өдрүүд

Үүрдийн эрх чөлөө.

Үлэмж гоо сайхан гэдэг

Үлэмж гоо сайхан гэдэг юу ч байж болно шүү дээ.

(Харж л чадаж байвал)

Өнгөрснөөс үлдсэн шарх сорви

Өнөөдөр биднийг бүтээж

Өнө эртийн хүслүүд сэрээж байна.

Өөр өөрсдийнхөөрөө л бид намрыг буддаг.

Тэнд ертөнцийн бүх л өнгө байдаг.

(Харж л чадаж байвал)

Намар бол эрх чөлөө...

Төрсний дараах өдрүүд

Үнэндээ л уй гуниг.

Төрөх өдрөөс өмнөх бүх өдрүүд

Бүх шөнүүд

Зуурдын эрх чөлөө...

***

Сайхан шүлэг шиг наймдугаар сар төгсөж байна

Санамсаргүйгээр үүлс үүлсдээ үүрлэж

Салхи салхиндаа үүрсэж байна.

Тэр салхины гүнд сансарын агаар буй

Тэр л үүлсийн зүрхэнд газрын нулимс буй

Уртын урт өдрүүд уйтгарт шүлэг шиг одож байна.

Хуучин өдрүүдээ шинэ өглөөгөөр сольж

Одоо л саяхан төрсөн мэт амьсгалж болохоор байна.

Муу шүлэг шиг өдрүүдэд сайн хүн шиг оршихоос залхаж байна.

Мунхаглал минь залуу насны чимэг сэлт байсныг

Муу ч сайн ч үгс хэлхэж зүдэрдэгийн хувьд анзаарч байна.

Өрөөсөн юмс ч өөртэйгөө нийлээд хосолдогийг

Өршөөл мэт өдрүүдийг өршөөлгүй давах зориг

Зүрхтэй бүхэнд оршдогийг таллаж гарсан шөнийн сар, бүтэн мандах өглөөний нар гэрчилж байна.

Сайхан шүлэг шиг наймдугаар сар ингээд л төгсөж байна.

Сайхнаас сайхан шүлэг шиг есдүгээр сар тэнгэрийн цонхоор дуулж байна!

***

Хүмүүс нулимстай, амьтад ч нулимстай

Дэлхий нясуун далайтай, далай гашуун нулимстай

Хүйтэн огторгуйг нөмрөх хөнжил үгүй

Хүйтэн огторгуйг нөмрөх хөнжил байлаа ч

Хүйтэн нулимсыг дулаацуулах огторгуй үгүй.

Сар сорвитой, салхи ч шархтай

Санаа алдалтууд санаанд оромгүй нууцуудтай

Сарны харанхуй тал бүрхэг өдөр шиг хуучин гунигтай.

Салхи салхиа түших, өвс өвсөө налах, хүн хүнээ хүсэх оршихуй

Сая сая оддын дор буй.

Сая сая оддын дор сайхан бодлууд нисэлдэх нь

Сая сая оршихуйн хувьд аугаа их зол юм даа.

Сая сая оршихуйн хувьд аугаа их гуниг нь юм даа.

Хүмүүс нулимстай, амьтад ч нулимстай

Дэлхий нясуун далайтай, далай ч гашуун нулимстай

Хүйтэн огторгуйг нөмрөх хөнжил үгүй.

Хүйтэн огторгуйг нөмрөх хөнжил байлаа ч

Хүйтэн нулимсыг дулаацуулах огторгуй үгүй…

Яруу найрагч Б.Ууганбаяр хоёр дахь шүлгийн түүвэр "Давс хийгээд усны шүлгүүд" -ээ хэвлүүлжээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.