Олон цаг ажилласны улмаас жилд олон зуун мянган хүн нас барж буйг ДЭМБ тогтоосон бөгөөд цар тахлын энэ үед улам ихсэх хандлагатай байгааг анхааруулж байна.

Дэлхий нийтийг хамарсан уг судалгаагаар 2016 онд 745 мянга гаруй хүн олон цагаар ажилласны улмаас зүрх судасны өвчин, цус харваж нас барсан нь тогтоогджээ.

Тус судалгаагаар долоо хоногт 55-аас дээш цаг ажиллах нь амь насанд ноцтой аюул учруулж байна гэв.

ДЭМБ-ын Байгаль, цаг уурын өөрчлөлт, Эрүүл мэндийн газрын захирал Мария Нейра “Бид ажилчдын амь насыг хамгаалах ажилд илүү их дэмжлэг үзүүлэхийг эрмэлзэж байна” хэмээн мэдэгдсэн байна. Илүү цагаар ажилласны улмаас амь насаараа хохирсон хүмүүсийн 72 хувь нь дунд болон түүнээс дээш насны эрэгтэй хүмүүс байсан аж. Түүнчлэн Зүүн өмнөд Ази, Номхон далайн бүс нутаг, Хятад, Австрали, Япон Улсын иргэд илүүтэй өртжээ.