Мьянмарын гурван сэтгүүлч, хоёр идэвхтнийг Тайландад хууль бусаар нэвтэрсэн хэрээр баривчилж, албадан гаргах магадлалтай байна хэмээн орон нутгийн хэвлэл мэдээлжээ.

Эдгээр Мьянмарын идэвхтнүүд болон сэтгүүлчдийг Чианг Май хотод баривчилсан бөгөөд албадан гаргахгүй байхыг хэвлэл мэдээллийнхэн уриалж байна. Хэрэв тэд нутаг буцвал амь насанд нь халтай хэмээн эрх баригчдад мэдэгдэж, НҮБ-аас тусламж хүссэн байна.

Мьянмарт өнгөрсөн хоёрдугаар сарын 1-ны өдөр цэргийн хүчнийхэн төрийн эргэлт хийсэнд иргэд бухимдлаа илэрхийлэн жагссан билээ. Тэгвэл тус явдлын дараа цэргийн хүчнийхэн хараат бус сэтгүүл зүйн тусгай зөвшөөрлийг цуцалсан тул олон сэтгүүлчид, идэвхтнүүд Тайланд руу дүрвээд буй аж.