ОХУ-ын шоронд хоригдож буй Кремлийн шүүмжлэгч Алексей Навальный өлсгөлөн зарлаж байгаагаа мэдэгджээ.

Өнгөрсөн долоо хоногт Алексей Навальныйгийн өмгөөлөгч түүний биеийн байдал муу байна хэмээн мэдээлсэн юм. Нуруу нь өвдөж, нэг хөл нь мэдээгүй болсон бөгөөд Навальныйгийн амь насанд заналхийлж байж болзошгүй хэмээсэн юм.

Харин шоронгийн удирдлагууд “Түүний биеийн байдал сайн байна. Сэтгэл ханамжтай байгаа” гэв.

Алексей Навальный өөрийн инстаграм хуудсандаа “Би эмчлүүлэх, эм авах эрхтэй. Гэвч надад алийг нь ч зөвшөөрсөнгүй. Миний нурууны өвчин хөл рүү орсон. Тиймээс хуулийг дагахыг шаардаж өлсгөлөн зарлаж байна” хэмээжээ.

Уг мэдэгдлийн хариуд шоронгийн удирдлагууд “Түүнд шаардлагатай бүх эмчилгээг хийж байна” хэмээн мэдээллээ.