2020 оны тавдугаар сарын 25-ны өдөр АНУ-ын цагдаагийн албан хаагч өнгөт арьстан залууг хүзүүнд нь тушиж, амийг нь хөнөөсөн хэрэг гарч байв. Тус явдлын дараа орон даяар арьс өнгөөр ялгаварлах үзлийн эсрэг “Өнгөт арьстнууд ч мөн амьдрах эрхтэй” хэмээн жагсаж байсан билээ. Тэгвэл уг хэргийн шүүх хурал хоёр дахь өдрөө үргэлжилж байна.

Шүүх хурлын үеэр хэргийн гэрч болсон өсвөр насны охин Дарнелла Фрейзиэр “Хохирогч Жорж Флойд цагдаагаас “амь гуйж байсан” хэмээн шүүх танхимд дурсав.

Дарнелла нь уг явдлын гэрч болсон найман минутын бичлэгийг хийсэн бөгөөд шүүхийн танхимд “Түүнийг аврахын тулд юу ч хийгээгүйд уучлаарай” гэжээ.

Харин Жорж Флойдын аминд хүрсэн 45 настай цагдаа Дерек Шаувин болон түүний өмгөөлөгчид “Жорж Флойд мансууруулах бодис хэтрүүлэн хэрэглэсэн явдал түүнийг үхэлд хүргэсэн. Цагдаа асан Шаувин өөрийн ажлаа л гүйцэтгэж байсан” хэмээн мэдээлж буй юм.  Гэвч хэргийн прокурорууд ес гаруй минут хүзүүн дээр нь өвдөглөж суусан явдал үхэлд хүргэсэн хэмээн үзжээ.