Мозамбик Улсын хойд хэсэгт орших Палма хотод халдлага болж хэдэн арван хүн нас барлаа хэмээн тус улсын Батлан хамгаалахын яам мэдээлжээ.

Нас барсан хүмүүсийн долоо нь зочид буудлын бүслэлтээс зугтах гэж байгаад амиа алдсан гэжээ.  

Өнгөрсөн лхагва гарагт Исламын зэвсэгт бүлэглэл 75 мянган хүн оршин суудаг Палма хотыг бүслэлтэд авсан бөгөөд энгийн иргэд руу халдаж байгаа аж. Одоогоор уг хотын иргэдтэй харилцаа холбоо тасраад байгаа тул хэдэн хүн амиа алдсан нь тодорхойгүй байна гэв. Гэрчийн мэдээлж буйгаар “Энэ хотод хамгаалалт байхгүй байна. Тиймээс бүгд амиа бодож зугтах хэрэгтэй” гэсэн бөгөөд хот хүний “цогцсоор” дүүрсэн гэжээ.

Тусламжийн агентлагууд Палма хотын боомт руу хөлөг онгоц илгээж, дотоод болон гадаадын иргэдийг нүүлгэн шилжүүлж байгаа гэв.