Дэлхий дахинд үүссэн хиймэл оюуны(AI) хурдацтай өсөлтийн ачаар Ази даяар үйлдвэрлэлийн салбарын идэвхжил есдүгээр сард тэлжээ. Пүрэв гарагт танилцуулсан дэлхийн улс орнуудын хувийн хэвшлийн судалгаануудын тайлангаас харахад АНУ-Израил болон Ираны хоорондох дайны улмаас үүсээд буй үнийн дарамтад сэтгэл чилээж байсан бодлого тодорхойлогчдын хувьд энэ нь зарим талаар таатай мэдээ болж байна.

       Эрчим хүчний үнэ эргэн өссөн нь дэлхийн эдийн засгийн төлөв байдлыг тодорхойгүй болгож байгаа. Гэхдээ эдийн засаг нь экспортод түшиглэдэг Япон, БНСУ болон Тайвань зэрэг улсуудын хувьд хагас дамжуулагч болон хиймэл оюунтай холбоотой бараа бүтээгдэхүүний эрэлт тогтвортой байсан. Энэ нь үйлдвэрлэлийн салбар тэлэлттэй гарахад нөлөөлсөн байна. Мөн цаг агаарын саатал сарниж, үйлдвэрүүд хэвийн ажиллагаандаа орсноор БНХАУ-ын үйлдвэрлэлийн идэвхжил ч мөн өнгөрсөн сард тэлсэн нь харагдаж байна.

    Тухайлбал БНСУ-ын экспортын эрэлт сүүлийн 15 жил гаруйн хугацаан дахь хамгийн хурдан өсөлтийг үзүүлсэн. Тус улсын үйлдвэрлэлийн салбарын идэвхжил есдүгээр сард сүүлийн дөрвөн сарын хамгийн дээд маржинаар нэмэгдсэн.

     S&P Global Market Intelligence-ийн эдийн засагч Усама Бхатти БНСУ-ын талаар "Шинээр буй болсон эрэлт болон үйлдвэрлэлийн өсөлтийн аль аль нь сүүлийн таван жил хагасын хугацаан дахь хамгийн дээд түвшинд хүрсэн. Судалгаанаас харахад энэхүү өсөлт нь хагас дамжуулагч болон авто машины салбарын үзүүлэлттэй холбоотой байна" гэлээ. S&P Global-аас гаргадаг БНСУ-ын Үйлдвэрлэлийн худалдан авалтын менежерүүдийн индекс (PMI) наймдугаар сард 52.3 байсан бол есдүгээр сард 53.9 болж өссөн нь тавдугаар сараас хойших хамгийн дээд үзүүлэлт боллоо. Уг үзүүлэлт БНСУ”ын хувьд эдийн засгийн өсөлт ба агшилтыг заагладаг 50 нэгжийн босгоноос дээш 10 дахь сардаа дараалан хадгалагдаж байгаа юм.

Дэлхийн хиймэл оюун ухааны өсөлтийн ашиг шимийг хүртэж буй дараагийн орон болох Тайванийн PMI индекс наймдугаар сард 54.7 байсан бол есдүгээр сард 56.7 болжээ.

       Харин Японы S&P Global PMI индекс есдүгээр сард 54.1 болж, өмнөх сарынхаас 0.8 нэгжээр бага зэрэг буурсан нь нийлүүлэлт болон шинэ эрэлт саарсантай холбоотой. Энэ нь сүүлийн зургаан сарын хамгийн сул үзүүлэлт гэж болно. Гэхдээ өсөлт сааарсан хэдий ч гадаад эрэлт хүчтэй хэвээр байгаа. Ази дахь эрэлт өндөр, мөн АНУ руу чиглэсэн борлуулалт сайжирсны ачаар шинэ экспортын захиалга ес дэх сардаа дараалан өсөөд байна. Гэхдээ үнийн дарамт өндөр хэвээр байгаа. Компаниуд борлуулалтын үнээ 2022 оны сүүлээс хойших хамгийн өндөр хувиар үргэлжлүүлэн нэмсээр байгаа аж.

     Азийн бусад эдийн засгуудын хувьд үйлдвэрлэлийн идэвхжил алаг цоог гэж хэлж болно. Индонез, Вьетнам зэрэг улсад үйлдвэрлэлийн салбар тэлсэн бол Филиппин, Малайзын орнуудад агшсан болохыг судалгааны дүн харуулж байна.