Цаг уурын байгууллагын мэдээлснээр аравдугаар сард ихэнх нутгаар агаарын температур олон жилийн дунджаас дулаан, харин нутгийн хойд хэсгээр дунджийн орчим байх төлөвтэй байна.

     Хур тунадас нутгийн баруун өмнөд хэсгээр олон жилийн дунджаас бага, хойд болон зүүн өмнөд хэсгээр ахиу, бусад нутгаар дунджийн орчим орох төлөвтэй байна. Хэдийгээр сарын дундаж температур ихэнх нутгаар дулаан байх боловч гэнэтийн хүйтрэл ажиглагдах зэрэг температурын хэлбэлзэл өндөр, салхи шуурга ихтэй байх магадлалтай байна.

     Иймд малчид дулаан өдрүүдийг ашиглан хадлан, тэжээлээ бэлтгэж, малын хашаа хороо болон өвөлжилтийн бэлтгэлийг эртнээс хангахыг анхаарууллаа. Мөн тариаланчид ургац хураалтын ажлыг шуурхай дуусгаж, хураасан үр тариа, төмс, хүнсний ногоог хайрагдахаас хамгаалах шаардлагатай байна.

     Түүнчлэн нойтон цас орсон үед зам, даваа хаагдах, халтиргаа гулгаа үүсэх зэрэг эрсдэлтэй тул холын замд гарахын өмнө цаг агаарын богино хугацааны урьдчилсан мэдээг авч ашиглахыг зөвлөж байна.

Баруун аймгуудын нутгаар

    Агаарын дундаж температур нийт нутгаар олон жилийн дунджаас дулаан, хур тунадас Баян-Өлгий, Ховдын нутаг болон Говь-Алтай, Баянхонгорын өмнөд хэсгээр дунджаас бага, бусад нутгаар дунджийн орчим байна. Сарын эхээр нутгийн хойд хэсгээр нойтон цас орж, ихэнх нутгаар хүйтэн байх төлөвтэй. Нэгдүгээр арав хоногийн дунд болон сүүлч, гуравдугаар арав хоногийн эхэн болон дунд үеэр ихэнх нутгаар дулаан байх бол хоёрдугаар арав хоногийн эхэн, гуравдугаар арав хоногийн дунд болон сүүлчээр сэрүүсэх төлөвтэй байна.

     Хоёрдугаар арав хоногийн дунд үе, гуравдугаар арав хоногийн эхэн болон сүүлчээр хур тунадас, уулархаг нутгаар нойтон цас орж, салхи ширүүсч болзошгүй.

Төвийн аймгуудын нутгаар

    Агаарын дундаж температур ихэнх нутгаар олон жилийн дунджийн орчим, харин Хөвсгөл, Архангайн баруун, Төв аймгийн өмнөд хэсгээр дунджаас дулаан байна. Хур тунадас Булган, Сэлэнгийн нутаг, Хөвсгөлийн зүүн, Төв аймгийн хойд хэсгээр дунджаас ахиу, бусад нутгаар дунджийн орчим орох төлөвтэй. Сарын эхээр нутгийн хойд хэсгээр нойтон цас орж, хүйтэн байна. Нэгдүгээр арав хоногийн дунд болон сүүлч, хоёрдугаар арав хоногийн дунд үе, гуравдугаар арав хоногийн эхэн болон дунд үеэр дулаарах бол хоёрдугаар арав хоногийн эхэн, гуравдугаар арав хоногийн дунд болон сүүлчээр сэрүүсэх төлөвтэй.

    Мөн нэгдүгээр арав хоногийн дунд болон сүүлч, хоёрдугаар арав хоногийн эхэн, дунд үе болон гуравдугаар арав хоногийн дунд, сүүлчээр хур тунадас орж, уулархаг нутгаар нойтон цас унан, салхи ширүүсч болзошгүй.

Зүүн аймгуудын нутгаар

     Хэнтийн ихэнх, Дорнодын хойд хэсгээр агаарын дундаж температур олон жилийн дунджийн орчим, бусад нутгаар дунджаас дулаан байна. Хур тунадас Хэнтий, Дорнодын хойд, Сүхбаатарын өмнөд хэсгээр дунджаас ахиу, бусад нутгаар дунджийн орчим орох төлөвтэй. Сарын эхээр нутгийн хойд хэсгээр нойтон цас орж, хүйтэн байх төлөвтэй. Нэгдүгээр арав хоногийн сүүлч, хоёрдугаар арав хоногийн эхэн болон дунд үе, гуравдугаар арав хоногийн эхээр дулаарах бол нэгдүгээр болон гуравдугаар арав хоногийн дунд, сүүлч, хоёрдугаар арав хоногийн дунд үеэр сэрүүсэх төлөвтэй байна.

    Мөн нэгдүгээр арав хоногийн сүүлч, хоёр болон гуравдугаар арав хоногийн эхэн, дунд үеэр хур тунадас орж, салхи ширүүсч болзошгүй.

Говийн аймгуудын нутгаар

     Өмнөговийн ихэнх нутгаар агаарын дундаж температур олон жилийн дунджаас дулаан, бусад нутгаар дунджийн орчим байна. Хур тунадас Өмнөговийн баруун хэсгээр дунджаас бага, Дорноговийн зүүн өмнөд хэсгээр ахиу, бусад нутгаар дунджийн орчим орох төлөвтэй. Нэгдүгээр арав хоногийн дунд үе, гуравдугаар арав хоногийн эхэн болон сүүлчээр ихэнх нутгаар дулаан байх бол нэгдүгээр арав хоногийн сүүлч, хоёрдугаар арав хоногийн эхэн болон сүүлч, гуравдугаар арав хоногийн дунд болон сарын сүүлчээр сэрүүсэх төлөвтэй байна.

      Хоёрдугаар арав хоногийн дунд үеэр ихэнх нутгаар хур тунадас орж, салхи ширүүсч, зарим газраар шороон шуурга шуурч болзошгүй байна.