Цагдаагийн ерөнхий газрын удирдлагууд өчигдөр /2026.09.29/ Нийслэлийн Иргэдийн Төлөөлөгчдийн Хурлын дарга Д.Ихбаяр болон холбогдох албан тушаалтнуудтай уулзаж, нийслэлийн хэмжээнд гэмт хэрэг, зөрчлөөс урьдчилан сэргийлэх чиглэлээр хэрэгжүүлж буй ажил, арга хэмжээний талаар мэдээлэл солилцжээ.

     Уулзалтад Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд, Санхүү, ар талын албаны дарга, цагдаагийн хурандаа Д.Батчулуун, Урьдчилан сэргийлэх албаны дарга, цагдаагийн хурандаа Г.Арсланхуяг, НИТХ-ын дарга Д.Ихбаяр, Нийслэлийн Гэмт хэргээс урьдчилан сэргийлэх ажлын салбар зөвлөлийн ажлын албаны дарга Б.Оюу-Эрдэнэ болон бусад албан тушаалтнууд оролцсон байна.

      Энэ үеэр нийслэлийн хэмжээнд он гарснаас хойших эхний есөн сарын гэмт хэрэг, зөрчлийн нөхцөл байдлыг танилцуулж, гэмт хэрэг, зөрчлийг илрүүлэх, урьдчилан сэргийлэх, шуурхай арга хэмжээ авах чиглэлээр хэрэгжүүлэх ажлын талаар хэлэлцжээ.

     Мөн камерын хяналтын төв байгуулах, дэвшилтэт технологийг цагдаагийн байгууллагын үйл ажиллагаанд нэвтрүүлэх замаар гэмт хэрэг, зөрчлийг илрүүлэх, урьдчилан сэргийлэх боломжийг нэмэгдүүлэх асуудлыг хэлэлцсэн байна.