Дэлхийн удирдагчид энэ долоо хоногт НҮБ-ын Ерөнхий Ассамблейн чуулганд оролцож байна. НҮБ эдийн засаг, улс төрийн шахалтад ороод буй энэ үед дэлхийн удирдагчид Ойрх Дорнод болон ОХУ-Украины дайн, хиймэл оюуны асуудлыг хэлэлцэх төлөвтэй байгаа юм. Харин БНХАУ-ын төрийн тэргүүн Ши Жиньпин АНУ-ын Ерөнхийлөгч Доналд Трамптай уулзахын тулд НҮБ-ын Ерөнхий Ассамблейн хурлыг өнжиж байгаа нь анхаарал татаад байна. Мөн энэ хурлаар НҮБ-ын ерөнхий нарийн бичгийн дарга Энтони Гутеррешийн халааг авах залгамжлагчийг сонгоно.

Дэлхийн II дайны дараа анх удаа НҮБ нөлөөгөө хадгалахад томоохон бэрхшээлтэй тулгараад байгаа. Энэ үетэй зэрэгцэн АНУ-ын татварын шимтгэлийг танаж, НҮБ-ын олон арван байгууллагаас гарсан Дональд Трамп улс төрийн хатуухан шүүмжлэлд өртөөд буй. Хамгийн сүүлд 2021 онд дипломат цугларалтад цахимаар үг хэлж байсан БНХАУ-ын удирдагч Ши Жиньпин Нью-Йоркт очихын оронд ирэх пүрэв гарагт Вашингтонд Дональд Трамптай биечлэн уулзахаар болсон. Энэ дэлхийн хямралыг шийдвэрлэхэд НҮБ-ын үзүүлэх нөлөөний талаарх маргааныг улам гаарууллаа.

    Энэхүү маргааныг гүнзгийрүүлж буй нэг асуудал бол 80 жилийн түүхтэй тус байгууллагын дараагийн удирдагчийн тухай асуулт юм. Ерөнхий нарийн бичгийн дарга Энтони Гутеррешийн бүрэн эрхийн хугацаа 2026 оны эцэст дуусах бөгөөд дараагийн удирдлагаар сонгогдох магадлалтай хүн одоогоор тодорхой болоогүй байна.НҮБ-ын Аюулгүйн Зөвлөлийн 15 гишүүн орон ОХУ-Украин, хиймэл оюун болон Ойрхи Дорнодын асуудлаар өндөр түвшний уулзалт хийнэ. Тухайлбал Арабын улсуудын удирдагчидтай хэлэлцээ хийж магадгүй гэж дипломатууд таамаглаж байна.

      Трампын хоёр дахь бүрэн эрхийн хугацаа эхлээд жил гаруй болоод буй. Олон улсын хямралын судалгааны (Crisis Group) хэсгийн удирдагч Ричард Гован: "Бид НҮБ-ыг шууд уналтад орсон гэж хэлэхгүй ч тодорхойгүй гацалтад орсон нь ажиглагдаж байгаа" хэмээжээ.

НҮБ өнгөрсөн жил хүнд байдлаас гарч чадсан ч ойрын ирээдүйн үйл ажиллагаа тодорхойгүй байгааг шинжээчид онцолж байна.

АНУ энэ долоо хоногт төсөвтөө 725 сая ам.долларын татвар төлснөөр Ассамблейд санал өгөх эрхээ алдалгүй үлдэж чадсан. Гэхдээ АНУ тус байгууллагад нэг тэрбум гаруй ам.долларын өртэй хэвээр байгаа аж.

Эх сурвалж: Reuters.com