Йемен дэх Хусит бүлэглэл АНУ-ын холбоотон болох Саудын Арабын хэд хэдэн хот руу цохилт өгсөн. Харин АНУ-ын хүчнүүд өчигдөр буюу мягмар гарагт Ираны газрын тосны таван танкерийг устгасан. Улмаар Иран Йордан дахь АНУ-ын баазыг хараандаа аваад байна.

     Хусичууд Саудын Арабын өмнөд хэсэгт орших дөрвөн хот руу халдаж, 73 хүнийг шархдуулан, газрын тосны байгууламжийг шатаасан. Энэ нь зургаан сар үргэлжилж буй дайны хурцадмал үеийг эхлүүлээд байна. Саудын Арабт болсон халдлага дэлхийн газрын тосны зах зээлд савлагаа үүсгээд байгаа. Үүнтэй зэрэгцэн АНУ-ын зэвсэгт хүчний Төв командлалын зүгээс өчигдөр Ираны газрын тос тээвэрлэгч таван танкер хөлгийг устгаснаа мэдэгдэж бичлэг нийтэлсэн. Энэ үйлдлээ сүүлийн хоёр хоногт Исламын хувьсгалт гварди АНУ-ын тэнгисийн цэргийн байлдааны хөлөг онгоц руу баллистик пуужингаар хоёр ч удаа халдсаны хариу арга хэмжээ хэмээн тайлбарлав. Мөн энэхүү халдлагын улмаас АНУ-ын талаас нэг ч хүн хохироогүй гэсэн юм

     АНУ-ын Төрийн нарийн бичгийн дарга Марко Рубио Колумбад хийсэн айлчлалынхаа үеэр “Иран АНУ-ын тэнгисийн цэргийн хөлөг онгоцод халдах, эсвэл тийм оролдлого хийх бүрдээ танкер хөлөг онгоцуудаа алдах болно” гэж мэдэгдэж байсан.

      Өчигдөр газрын тосны танкеруудыг устгасны хариу цохилт болгон Иран зүгээс АНУ-ын хэд хэдэн бүсэд халдсан. Үүний нэг нь Йорданы Аль-Азракийн ойролцоох АНУ-ын бааз руу 20 баллистик пуужингаар цохилт өгсөн явдал. Йорданы зүгээс 18 пуужинг замаас нь устгасан, хоёр нь хүнгүй бүсэд унасан, хохирол амсаагүй гэж мэдэгдээд байна.

       Мөн Ираны холбоотон Исламын хувьсгалт гварди Персийн буланд байрлаж асан АНУ-ын тэнгисийн цэргийн мина тээгч хоёр хөлөг онгоц руу халдав.

      Ираны зүгээс Кувейт болон Бахрейны боомтууд дахь газрын тосны танкеруудыг байгаа болгосон гэж хэмээн заналхийлээд байгаа. АНЭУ-ын Хор Факкан боомтод шингэрүүлсэн байгалийн хий тээвэрлэгч танкер гэмтсэн байна. Үүнд хэн хариуцлага хүлээх нь одоогоор тодорхойгүй аж.

       Өнгөрсөн наймдугаар сард дайн нам гүм болоод байсан ч Иран, АНУ сүүлийн өдрүүдэд байдлыг хурцдуулж Брент маркийн газрын тосны жишиг үнийг долоодугаар сарын 23-наас хойших хамгийн өндөр түвшинд хүргээд байгаа юм.

Эх сурвалж: https://www.reuters.com/

С.Энхцэцэг