Непал-Төвдийн хилийн бүсэд болсон гэнэтийн үер, хөрсний нуралтын улмаас одоогийн байдлаар дор хаяж 177 хүн амиа алдаж, хэдэн зуун хүн сураггүй болсон байна.

   Гамшгийн улмаас тосгон суурингууд усанд автаж, авто зам болон бусад дэд бүтцийн байгууламжууд ихээхэн сүйджээ. Үер Лхагва гарагийн өглөө Непалын нийслэл Катманду хотоос хойд зүгт орших Расува бүсэд болжээ. АНУ-ын Геологийн албаны мэдээлснээр, мөстлөгийн хэсэг нуран унаснаас үүдсэн чулуу, шороон урсгал үерийн шалтгаан болсон байна.

   Одоогоор хилийн хоёр талд эрэн хайх, аврах ажиллагаа үргэлжилж байгаа бөгөөд ойрын өдрүүдэд амь үрэгдэгсдийн тоо эрс нэмэгдэх төлөвтэй байна.Төвдийг хянадаг БНХАУ-ын төрийн хэвлэлүүд гамшгийн улмаас олон хүн амь үрэгдэж, их хэмжээний хохирол учирсан талаар мэдээлжээ. Харин Непалын албаныхан гамшгийн хохирлыг “асар их хэмжээнийх” гэж тодорхойлсон байна.

   Непалын цагдаагийн байгууллагын мэдээлснээр пүрэв гарагийн байдлаар үерт өртсөн бүс нутгаас 177 хүний цогцсыг олжээ. Гэсэн ч амь үрэгдсэн болон сураггүй болсон хүний бодит тоо үүнээс хавьгүй өндөр байх магадлалтай байна. Түүнчлэн Непалын эрх баригчдын мэдээлснээр нийт 826 хүн сураггүй байгаа бөгөөд тэдний 644 нь холбоо тасарсан жуулчин аж.

   Сураггүй болсон хүмүүсийн дунд 178 Энэтхэгийн жуулчин, 127 Непалын жуулчин, 65 АНУ-ын иргэн, 53 Украины иргэн, 51 Малайзын иргэн, 35 Австралийн иргэн, 33 Их Британийн иргэн байгаа талаар Непалын Аялал жуулчлалын зөвлөлийн төлөөлөгч Сунил Шарма BBC-д мэдээлжээ.