Непалын хойд хилийн орчмын уулархаг бүс нутгийг лхагва гарагт хүчтэй үер дайрсны улмаас 160 гаруй хүн амиа алдаж, хэдэн зуун хүн сураггүй болоод байна.

  Сураггүй болсон хүмүүсийн дунд 391 гадаадын жуулчин, 93 Балбын иргэн байгаа талаар холбогдох албанаас мэдээлжээ.Гамшигт өртсөн бүс нутагт эрэн хайх, аврах ажиллагаа болон үерийн хор уршгийг арилгах ажлыг эрчимжүүлэх асуудлаар Непалын Засгийн газар шуурхай хуралдаан зарласан байна. Тус улсын арми болон бусад аюулгүй байдлын байгууллагууд гамшигт өртсөн дүүргүүдэд эрэн хайх, аврах ажиллагаа явуулж байгаа ч уулархаг, гүн хөндий, нарийн хавцал ихтэй газар нутаг нь аврах ажиллагааг хүндрүүлж байгаа аж.

   Непалын Ерөнхийлөгч Рамчандра Паудел хүний амь нас, эд хөрөнгө ихээр сүйдсэнд гүнээ эмгэнэл илэрхийлж, төрийн байгууллага, улс төрийн намууд болон иргэдийг аврах, тусламжийн ажиллагааг эрчимжүүлэхийг уриалжээ. Үерийн улмаас томоохон усан цахилгаан станц болон цахилгаан дамжуулах байгууламжууд эвдэрч, урьдчилсан байдлаар 19 орчим гүүр, 40 километр авто зам сүйдсэн байна.

   Расува дүүрэг гамшигт хамгийн ихээр өртжээ. Үерийн хүчтэй урсгал айл өрх, орон сууцны барилга, худалдаа, үйлчилгээний төв, усан цахилгаан станцын байгууламж, авто зам болон бусад дэд бүтцийг урсган сүйтгэсэн байна.Расува дүүргийн орлогч захирагч Друва Прасад Адхикари “Олон хүн сураггүй болсон тухай мэдээлэл ирсэн бөгөөд эрэн хайх, аврах ажиллагаа үргэлжилж байна” гэж мэдэгджээ.

Үертэй холбоотойгоор Энэтхэгийн Засгийн газар Непалтай хиллэдэг мужуудынхаа эрх баригчдад өндөржүүлсэн бэлэн байдалд ажиллах үүрэг өгөөд байна.