Дэлхий даяар хамгийн олон хэрэглэгчтэй “Facebook” платформын толгой компани болох “Meta”-гийн гүйцэтгэх захирал Марк Цукерберг үүсгэн байгуулсан платформдоо шинэ өөрчлөлтүүд хийх гэж байгаа тухайгаа мэдэгдэл хийжээ. Тодруулбал, “Facebook” платформ ойрын хугацаанд контентын хязгаарлалтыг болиулж, хэрэглэгчдийн оруулж буй сэтгэгдэл, нийтлэлүүдэд цензур тавьж, тохируулдгаа болиулах гэнэ. Тус платформын хувьд өнгөрсөн жилүүдэд шинэ шинэчлэлүүдээрээ хүний эрхэд халдсан байж болзошгүй утгатай эсвэл зохиогчийн эрх зөрчсөн контентыг хязгаарладаг, хэн нэгнийг гүтгэсэн, төөрөгдүүлэн, хуурамч утга агуулгатай нийтлэл, комментыг хянадаг шинэчлэлүүдийг оруулж ирээд байсан юм.

Түүнчлэн Марк Цукербергийн толгойлдог “Meta” компани өнгөрсөн долоо хоногт томоохон бүтцийн өөрчлөлт хийж, шинэ захирлууд томилсон. Ингэхдээ АНУ-ын Ерөнхийлөгчөөр хоёр дахиа сонгогдоод байгаа Дональд Трампын Бүгд Найрамдах намын хүмүүсийг голцуу “Facebook”-ийн захирлаар томилсон бөгөөд барууны хэвлэлүүд үүнийг “Марк Цукерберг Д.Трампад бууж өглөө” гэж бичиж байна.