БНХАУ-ын Төвөдийн өөртөө засах орны Шигазэ хотын Динри хошуунд орон нутгийн цагаар өчигдрийн 09:05 цагт 6.8 магнитудын хүчтэй газар хөдөлсөн. Тэгвэл сүүлийн үеийн мэдээллээр газар хөдлөлтийн улмаас амиа алдсан хүний тоо 126-д хүрсэн байна.

Тухайлбал, газар хөдлөлтийн улмаас тус хошуунд 1000 гаруй барилга, байшин сүйдээд буй бөгөөд Хятадын Газар хөдлөлтийн судалгааны газар байгалийн гамшгийн уршгийг арилгахын тулд II зэргийн яаралтай тусламжийн ажиллагааг эхлүүлсэн. Үүнтэй холбоотойгоор ойролцоох хот, хошуунуудаас 1500 гаруй аврагч дайчилж ажиллуулж байгаа аж. Гэсэн ч гамшгийн нөхцөл байдал хүнд байгаа бөгөөд нуранги дороос иргэдийн аврах, эрэн хайх ажиллагаа явуулахад хүндрэлтэй байгаа гэнэ.

Ташрамд дурдахад, газар хөдлөлтийн голомт хойд өргөргийн 28.5 градус, зүүн уртрагийн 87.45 градуст байжээ. Хятадын Газар хөдлөлтийн сүлжээний төвийн мэдээллээр, газар хөдлөлт 10 км-ийн гүнд болсон байна. Голомт нь 20 км-ийн радиус дотор 6900 орчим хүн амтай Динри хошууны Цого сууринд байжээ.