БНСУ-ын Ерөнхийлөгч Юн Сок Ёол улс орон даяар цэргийн онц байдал зарласнаас хойш Өмнөд Солонгосын улс төрийн нөхцөл байдал хурцадмал байдалд шилжлээ. Цэргийн онц байдлыг албан ёсоор цуцалснаас хойш тус улсын парламент төрийн тэргүүнийг бүрэн эрхээс нь түдгэлзүүлж, огцруулах санал гарган импичментийн хурал зохион байгуулж эхэлсэн бөгөөд Ерөнхийлөгч Юн Сок Ёол огцрох эсэх нь цаг хугацааны асуудал болсныг орон нутгийн хэвлэлүүд мэдээлж байна.

Тэгвэл шинэ мэдээллээр Ерөнхийлөгч Юн Сок Ёолыг Өмнөд Солонгосын цагдаагийн байгууллагаас “бослого гаргасан” хэргээр шалгаж эхэлжээ. Хэдий орон даяар цэргийн байдал зарлахдаа “Сөрөг хүчнийхэн нууцаар хуйвалдаж, улс төрийн эсрэг ажиллагаа явуулж, бослого хийхээр төлөвлөж байна” гэж мэдэгдсэн ч БНСУ-д үүссэн эмх замбараагүй байдлаар дараагаар Ерөнхийлөгч өөрөө бослого гаргасан хэрэгт шалгагдаж байгаа аж. Энэ талаар Солонгосын “Yonhap” мэдээллийн сайт “Ерөнхийлөгчийн халдашгүй эрхийг давсан хоёр хэрэг байдгийн нэг нь бослого. БНСУ-д бослого гаргасан хэрэг нь ноцтой хэрэгт тооцогддог бөгөөд бослогыг удирдсан хүнд цаазын ял оноодог” хэмээн онцолжээ.