АНУ-ын “United Healthcare” даатгалын компанийн гүйцэтгэх захирал Брайан Томпсон өчигдөр орой буюу орон нутгийн цагаар лхагва гарагийн өглөө буудуулж амиа алджээ. Тодруулбал, Брайан Томпсон руу өглөө 07:00 цагийн үед Нью-Йорк хотын Манхэттен дүүрэгт байрлах “Hilton” зочид буудлын гадна зогсоож байхад нь зэвсэглэсэн этгээд халдсан бөгөөд гэмт этгээд нь амны хаалт зүүж, дуу намсгагч ашиглаж, Брайан Томпсоныг буудчихаад хэргийн газраас зугтжээ. Одоогийн байдлаар цагдаа нар хэргийн газрын хамгаалалтад авч, мөрдөн шалгах ажиллагаа явуулж эхэлжээ. Мөн гэмт этгээдийг эрэн сурвалжилж эхэлсэн бөгөөд түүний талаар дэлгэрэнгүй мэдээлэл өгсөн хүнийг 10 мянган ам.доллароор урамшуулах аж.

“Hilton” зочид буудлын гадна буудуулж амиа алдсан Брайан Томпсон нь 50 настай байсан бөгөөд 2004 оноос “United Healthcare” компанид ажиллаж, сүүлийн гурван жилийн хугацаанд гүйцэтгэх захирлын албан тушаал хашиж байсан гэнэ. Хэрэг гарах үеэр  “United Healthcare” компанийн жил тутамд зохион байгуулдаг хөрөнгө оруулагчдын уулзалт болж байсан бөгөөд талийгаач уулзалтад оролцох гээд зочид буудлын гадна байсан талаар барууны хэвлэлүүд мэдээлж байна.