Парисын Дарь эхийн сүм одоогоос таван жилийн өмнө буюу 2019 оны дөрөвдүгээр сарын 19-ний өдөр гал түймэрт өртөж, ноцтой сүйдээд байсан билээ. Тэгвэл өнгөрсөн таван жилийн хугацаанд Франц Улс дотоодоосоо санхүүжилт гаргаж, гаднаас хандив аван тус сүмийг сэргээн засварлаж байсан бөгөөд шинэ өнгө төрх бүхий Парисын Дарь эхийн сүмийн энэ сарын 7-нд албан ёсоор нээхээр болжээ.

Тодруулбал, Нотр-Дамын сүм түймэрт өртөн сүйдсэний дараа холбогдох албанаас 700 сая орчим еврогоор сэргээн босгох тооцоо гаргаж байв. Харин өнгөрсөн таван жилд сүмийг сэргээн засварлахад зориулан дэлхийн 150 орноос 846 сая евро цугласан бөгөөд сүмийг дахин босгоход 250 орчим компани, 1300 гаруй уран бүтээлч, барилгачид оролцсон гэнэ.

     Түүнчлэн Парисын Дарь эхийн сүмийг сэргээн засварлах ажил дууссантай холбогдуулан Францын Ерөнхийлөгч Э.Макрон сүмийн гадна үг хэлж, албан ёсны нээлтийг зарлажээ. Тэрбээр хэлсэн үгэндээ “2019 оны дөрөвдүгээр сард Нотр-Дамын сүм галд автсан нь Францын ард түмэн төдийгүй дэлхийн католик шашинтнуудад нөлөөлсөн томоохон үйл явдал болсон. Харин галын дөл рүү эр зориг гарган орсон Парисын гал сөнөөгчдийн ачаар бид энэ сүмээ аварч үлдсэн. Харин өдгөө бид шинээр сэргээн засварласан сүмээ дахин нээх гэж байна. Бидэнтэй эв санаагаараа нэгдэж, өгөөмөр сэтгэл гаргасан дэлхийн олон талд суугаа хандивлагчдын ачаар мөн Нотр-Дамын сүмийг дахин сэргээх боломжтой болсон. Мөн энэ сүмийг дахин сэргээн босгоход амьдралынхаа таван жилийг зориулсан уран бүтээлчид, барилгачдад гүнээ талархал илэрхийлье” хэмээн онцолж, дэлхийн орнуудын удирдагчдыг Парисын Дарь эхийн сүмийн нээлтэд урьжээ.

Шинээр сэргээн засварласан Парисын Дарь эхийн сүмд шинэ тахилын ширээ, алтан загалмай зэрэг шинэ бүтээл урласан бөгөөд таазыг нь илүү өндөр болгосон гэнэ. Мөн дотоод зохион байгуулалтыг шинээр хийж, зайг нь нэмэгдүүлсэн бөгөөд 2017 оны байдлаар 12 сая орчим жуулчин авдаг байсан Нотр-Дамын сүм ирэх жилээс жилд 14-15 сая жуулчин хүлээх авах юм байна.

ПАРИСЫН ДАРЬ ЭХИЙН СҮМИЙН ТҮҮХ

Notre-Dame de Paris буюу Парисын Дарь эхийн сүм нь Францын нийслэл Парис хотын төвд оршдог католик шашны сүм бөгөөд Франц Улс, дэлхийн католик шашинтнуудын нэгэн томоохон бэлэг тэмдэг. Тус готик хэлбэртэй сүмийн барилгыг Парисын хамба лам Морис де Сюллигийн санаачилгаар 1163 онд Францын хаан VII Луигийн үед эхэлсэн бөгөөд 1345 онд баригдаж дууссан байдаг.  Парисын Дахь эхийн сүмийн өндөр 35 метр, урт нь 130 метр бөгөөд өргөн нь 48 метр. Мөн сүмийн хонхны цамхгийн өндөр 69 метр, 13 тонн байдаг аж.

Сонирхуулахад, Францын нэрт зохиолч Виктор Гюгогийн 1831 онд хэвлэгдсэн ижил нэрт роман Парисын Дарь эхийн сүмийг илүү алдаршуулж, сүйрлээс аврахад хувь нэмэр оруулсан гэж үздэг.