АНУ-ын Пьемонт хотод зам тээврийн ноцтой осол гарч, гурван хүн амиа алджээ. Тодруулбал, өнгөрсөн долоо хоногт болсон Талархлын баярын өмнөх орой Калифорнийн их сургуулийн зургаан оюутан “Tesla Cybertruck” загварын автомашинтай осолдож, гал гарсны улмаас гурван зорчигч амиа алдсан байна. Урьдчилсан байдлаар цагдаагийн алба хаагчид хурд хэтрүүлж явсны улмаас осолд орсон гэж үзэж байгаа бөгөөд эмнэлэгт хүргэгдсэн зорчигчдын нэгний биеийн байдал маш хүнд байгаа гэнэ. Түүнчлэн цагдаагийн байгууллагаас хурд хэтрүүлсний улмаас осол гарсан гэж үзэж байгаа ч “Tesla Cybertruck” автомашины батарей галыг өдөөсөн байж болзошгүй байгаа аж. “Tesla Cybertruck” загварын цахилгаан автомашин нь лити-ион батарейтэй бөгөөд батерейны түүхий эдүүд галыг өдөөсөн байж болзошгүй гэж үзэн шалгалтын ажиллагаа явуулж байгаа юм байна.

Ташрамд дурдахад, нээлтээ хийсэн цагаасаа загвар, үзэмжээрээ олны анхаарлыг татаад байгаа "Tesla Cybertruck" загварын автомашин хөдөлгөөнд оролцож байхад нь цахилгаан мотороос гал гарсан, шатсан хэд хэдэн тохиолдол бүртгэгдэж байв. Хамгийн сүүлийн жишээ гэхэд, Калифорни мужийн хурдны зам дээр "Cybertruck"-ийн цахилгаан мотор шатаж, онцгой байдлын алба хаагчид гал унтраах машинтай очиж унтрааж байсан аж.