АНУ-ын Ерөнхийлөгчийн сонгуульд Дональд Трампыг дэмжиж оролцсон дэлхийн тэргүүн баян Элон Маскийн хөрөнгө өсжээ. Түүний эзэмшдэг “Тесла” компанийн хувьцаа 15 орчим хувиар өсөж, Элон Маск 26.5 тэрбум ам.доллароор нэмэгдсэн байна.

Тухайлбал, “Тесла”-гийн хувьцааны үнэ лхагва гарагийн арилжаа хаагдах үеэр 14.75 хувиар өсөж, 228.53 ам.долларт хүрчээ. Ингэснээр Элон Маскийн хөрөнгө “Bloomberg”-ийн тэрбумтнуудын жагсаалтад өсөж, нийт хөрөнгө нь 290 тэрбум ам.долларт хүрч, Элон Маск тэрбумтнуудын жагсаалтыг тэргүүлсэн амжилтаа хадгалсан байна. Харин түүний ард “Amazon”-ыг үүсгэн байгуулагч Жефф Безос 228 тэрбум ам.доллар, гуравдугаар байрт “Meta”-гийн үүсгэн байгуулагч Марк Цукерберг 202 тэрбум ам.долларын хөрөнгөөр жагсаж байгаа юм.

Ташрамд дурдахад, Элон Маск өнгөрсөн долдугаар сараас хойш АНУ-ын Ерөнхийлөгчийн сонгуульд Дональд Трампыг дэмжсэн. Мөн тэрбээр Пенсильвани мужийн иргэдээс Д.Трампыг сонгуульд дэмжих хүмүүсээс нэг хүнд сонгуулийн санал хураалт хүртэл өдөр бүр сая ам.доллар бэлэглэж байсан билээ.