Палестины хэт даврагч “ХАМАС” бүлэглэл, Израилын дундах мөргөлдөөн хоёр орны хилийн заагт оршдог Газын зурваст жил гаруй хугацаанд үргэлжилж байна. Дэлхийн хоёрдугаар дайнаас хойших хамгийн хөнөөлтэй мөргөлдөөн гэгдэж буй тус мөргөлдөөнд Газын зурвас дахь орон сууц, зам, дэд бүтцийн дийлэнх нь сүйдэж, оршин суугчид нь дүрвэсэн. Тэгвэл үүнтэй холбогдуулан НҮБ-ын шинэ тайландаа “Хэрэв “ХАМАС”, Израилын дайн маргааш дууссан ч Газын зурвасыг сэргээн босгоход 350 жил шаардлагатай” гэжээ. Мөн эдийн засгийн өсөлт нь 2007-2022 оны үеийнхтэй дүйцэх буюу дунджаар 0.4 хувийн өсөлттэй байж дээр дурдсан хугацаанд Газын зурвасыг эргэн хуучин хэвэнд нь оруулж, сэргээн босгох гэнэ.

“ХАМАС”, Израилын дайнд сүйдсэн Газын зурвасын нийт хохирлын хэмжээг Дэлхийн банкнаас 18.5 тэрбум ам.доллар гэж тооцсон. Уг мөргөлдөөнд өнгөрсөн оны аравдугаар сарын 7-нд “ХАМАС” бүлэглэл Израилын хотууд руу халдсанаар эхэлсэн бөгөөд өнөөг хүртэл Газын дайны улмаас 42 мянга гаруй хүн амиа алдаад байгаа аж.