Бүгд Найрамдах Турк Улсын нийслэл Анкара хот дахь төрийн өмчит “Turkish Aerospace Industries” компанийн байгууламжуудад террорист халдлага гарчээ. Террорист халдлагын улмаас таван иргэн амиа алдаж, 22 хүн шархадсан талаар тус улсын Дотоод хэргийн сайд Али Ерликая мэдэгдээд байна. Тэрбээр “Халдлагын үеэр тусгай албаныхан хоёр алан хядагчийг аюулгүй болгосон” гэжээ.

Мөн үүнтэй холбогдуулан НҮБ-ын Ерөнхий нарийн бичгийн дарга Антонио Гутерреш эмгэнэл илэрхийлж, “Бид холбогдох мэдээллийг хүлээж байгаа бөгөөд энгийн иргэд амь эрсэдсэн энэ халдлагыг зэмлэн буруушааж байна. Амиа алдсан хүмүүсийн ар гэрийнхэнд эмгэнэл илэрхийлж, шархадсан хүмүүст бүрэн эдгэрэхийг хүсье” хэмээснийг түүний хэвлэлийн төлөөлөгчийн орлогч Фархан Хак мэдэгдээд байгаа юм.

Аюулаас хамгаалах хүчнийхэн, гал сөнөөгчид, эмнэлгийн ажилтнуудыг халдлага болсон газар луу илгээсэн байна. Батлан ​​хамгаалахын компанийн ажилтнуудад аюулгүй байдлын үүднээс хоргодох байранд очих чиглэл өгсөн гэж хэвлэлүүдэд мэдээлжээ. Анкарагийн прокурорууд террорист халдлагыг мөрдөн шалгах ажиллагааг эхлүүлээд байгаа аж.