Дэлхийд тэргүүлэгч сансрын технологийн “SpaceX”, цахилгаан автомашины “Tesla” компанийг үүсгэн байгуулагч, дэлхийн тэргүүн баячуудын нэг Элон Маск АНУ-ын Ерөнхийлөгчийн сонгуульд Дональд Трампыг дэмжих хүмүүс дундаас өдөр бүр нэг хүнд сая ам.доллар өгөхөө амлажээ.

Тухайлбал, АНУ-ын ээлжит Ерөнхийлөгчийн сонгуульд Бүгд найрамдах намаас нэр дэвшиж буй Дональд Трамп өнгөрсөн амралтын өдөр Пенсильвани мужид сонгуулийн кампанит ажлаа явуулсан. Уг кампанит ажилд тэрбумтан Элон Маск өөрийн биеэр очиж оролцсон бөгөөд Ерөнхийлөгчийн сонгуульд Д.Трампыг дэмжиж буйгаа илэрхийлж, сонгууль хүртэл түүнийг дэмжиж байгаа хүмүүсээс өдөр бүр нэг хүнд сая ам.доллар өгөхөө мэдэгджээ. Түүнчлэн хэлсэн үгнийхээ баталгаа болгож Элон Маск сонгуулийн кампанит ажлыг үзэхээр ирсэн хүмүүсээс нэг хүнд сая ам.долларын чек өгсөн гэж Америкийн хэвлэлүүд мэдээлж байна.

Мөн Д.Трампын сонгуулийн кампанит ажилд оролцсон Элон Маск “Хэрэв Ерөнхийлөгчийн сонгуульд Камала Харрис ялалт байгуулбал АНУ-ын төгсгөл ирнэ” гэж мэдэгджээ.