Исламын Бүгд Найрамдах Иран Улс өнгөрсөн шөнө Израилын нутаг руу олон тооны пуужин харважээ. Тухайлбал, Ираны талын харвасан пуужингууд орон нутгийн цагаар 21:00 цаг орчимд Израилын Иерусалим, Тель-Авив тэргүүтэй суурин газруудад унасан байна. Израилын арми бөмбөгдөлтөөс эхлэхээс урьтаж мэдэгдсэнээр иргэдийн хоргодох байр руу нүүлгэн шилжүүлж чадсан ч хот, суурин газрын хохирлын хэмжээ их байгаа гэнэ. Харин Ираны талаас уг гэнэтийн дайралтыг “Энэ бол “Хезболла” болон “ХАМАС”-ын удирдагчид амиа алдсаны хариуд хийсэн ажиллагаа” хэмээн мэдэгдээд буй бөгөөд Израилын арми тэднийг 180 пуужин харвасан гэж урьдчилсан тооцоолоод байна.

Үүнтэй холбоотойгоор НҮБ-ын Ерөнхий нарийн бичгийн дарга Антонио Гутерреш яаралтай мэдэгдэл гарган Ираны дайралтыг буруушааж, “Ойрх Дорнод дахь мөргөлдөөнийг даамжруулахад хүргэх аюултай ажиллагаа” хэмээн мэдэгдэж, галаа зогсоохыг уриалжээ. Түүнчлэн АНУ-ын Ерөнхийлөгч Жо Байден армийн цэргүүддээ хандан Ираны пуужингийн дайралтыг няцаахад нь Израилд туслах тушаал гаргаад байгаа аж.