Сансарт өнгөрүүлсэн хугацаагаараа дэлхийн дээд амжилт тогтоосон Орос, Америкийн сансрын нисгэгчдийн баг “Союз” хөлгөөрөө дэлхийд газарджээ. Тухайлбал, “Союз” хөлөг Олон улсын сансрын станцаас салснаас хойш 03:30 цагийн дараа нисгэгчдийн баг Казахстаны тал нутагт газардсан байна. Газардалтын сүүлчийн шатанд "Союз" хөлөг улаан, цагаан өнгийн шүхрээр 7.2 метр секундийн хурдтай бууж, сүүлчийн секундэд зөөлөн газардахын тулд жижиг пуужингууд харважээ.

Сансрын нисгэгчдийг хөлгөөс гаргасны дараа таталцлын хүчинд дасан зохицоход нь туслахын тулд сандал дээр суулгаж, эрүүл мэндийн үзлэгт оруулсан байна. Сансрын станцад 374 хоног ажилласныхаа дараа эх дэлхийдээ эргэн ирж буй Олег Кононенко, Николай Чуб нар сансарт хамгийн удаан хугацаагаар байсан өмнөх дээд амжилтыг эвджээ. Мөн ОУСС-д зургаан сар ажилласан Америкийн сансрын нисгэгч Трейси Дайсон “Союз” хөлгөөр ирсэн байна.

Одоо тус станцад найман сансрын нисгэгч үлдсэн бөгөөд тэдний дунд анх төлөвлөснөөс урт хугацаагаар байрлахаар болоод буй Америкийн сансрын нисгэгч Батч Уилмор, Суни Уильямс нар байгаа юм. Тэд энэ оны зургаадугаар сард “Боинг” компанийн шинэ “Starliner” хөлгөөр тэнд очжээ. Гэвч хөлөгт техникийн асуудал үүссэн тул АНУ-ын НАСА агентлаг тэднийг “Starliner”-аар буцаах нь эрсдэлтэй гэж үзсэн байна. Иймээс хоёр сансрын нисгэгч ирэх онд “SpaceX”-ийн хөлгөөр буцаж ирэхээр төлөвлөж байна.