Францын прокурорууд өнгөрсөн амралтын өдөр “Telegram” платформын гүйцэтгэх захирал Павел Дуровыг баривчилж, мөрдөн байцааж эхэлсэн талаар олон улсын хэвлэлүүд мэдээлсэн. Тухайлбал, прокурорын байгууллагаас Павел Дуровыг өөрийн эзэмшдэг платформоо ашиглан зохион байгуулалттай гэмт хэрэг үйлдсэн, гэмт бүлэглэлд хууль бус гүйлгээ хийх боломж олгосон гэх үндэслэлээр шалгаж байгаа бөгөөд шүүхээс түүнийг гэмт буруутайг тогтоовол 10 хүртэлх жилийн хорих ял ногдуулж болзошгүй байна. “Telegram”-ын гүйцэтгэх захирал баривчлагдсанаас хойш түүнийг таван сая евро төлж, батлан даалтад гаргаж авсан ч хилийн хориг тавиад байгаа аж.

Харин энэ талаар “Telegram” компанийн зүгээс “Хэн нэгэн платформыг буруугаар ашиглахад эзэмшигчид нь хариуцлага хүлээлгэх гэж байгаа нь өөрөө буруу. Гүйцэтгэх захирал П.Дуровт ямар нэгэн гэм буруутай үйлдэл байхгүй” гэсэн албан тайлбар гаргаад буй. Түүнчлэн ОХУ, Украины дайн болон бусад цаг үеийн мэдээллийн хамгийн том эх үүсвэрүүдийн нэг болж байсан “Telegram” платформын гүйцэтгэх захирал баривчлагдсан нь ОХУ, Украины дайнд ч том нөлөө үзүүлж болзошгүйг мэдээлэл технологийн мэргэжилтнүүд онцолж байна.