Украины арми ОХУ-ын газар нутагт дайралтаа эрчимжүүлж, сүүлийн сар гаруйн хугацаанд Курск мужийн 74 хот, тосгон буюу 1000 орчим ам км талбайг эзлээд буй тухай мэдээлсэн. Тэгвэл Курскээр дамжуулан Кремльд томоохон шахалт үзүүлээд байсан Украины тал наймдугаар сарын 26-27-нд шилжих шөнө Оросын армийн бөмбөгдөлтөд өртжээ. Украины Агаарын цэргийн хүчнээс “Оросын тал Украины эсрэг хийж буй дайныхаа хамгийн хүчтэй агаарын довтолгоонуудын нэгийг хийлээ” хэмээн мэдэгдсэн бөгөөд Оросын арми шөнийн дотор Украины нийт газар нутгийн тэн хагасыг бөмбөгдсөн байна. Тодруулбал, тус Агаарын цэргийн хүчний командлагч Микола Олещукийн мэдээлснээр Оросын арми шөнийн дотор 127 пуужин, 109 байлдааны дроноор довтолгоо хийсэн гэнэ.

Бөмбөгдөлтийн улмаас долоон хүн амиа алдаж, олон арван хүн шархадсан гэх урьдчилсан мэдээлэл бий бөгөөд амиа алдагсдын тоо цаашид өсөх төлөвтэй байна. Түүнчлэн Оросын армийн агаарын довтолгоо эрчим хүчний дэд бүтцэд хүнд гэмтэл учруулсны улмаас Украины олон хот цахилгаангүй болоод байгаа учир харилцаа, холбооны асуудал гарч байгаа аж. Харин агаарын довтолгоотой холбоотойгоор ОХУ-ын талаас ямар нэгэн мэдэгдэл хийгээгүй бөгөөд барууны орнуудын мэдээлснээр Оросын арми байлдааны онгоц, дрон, пуужин харвагчдаа Польшийн нутаг дэвсгэрт байршуулж байгаа юм байна.