Этиоп Улсын баруун өмнөд хэсэгт хүчтэй аадар бороо орж, үерлэсний улмаас 200 гаруй хүн амиа алджээ. Тухайлбал, Этиопын Кенчо Шача Гозди мужийн албаны хүмүүсийн мэдээллээр үер, хөрсний гулгалтын улмаас 229 хүн амиа алдаад байгаа бөгөөд нас барагсдын тоо цаашид өсөж болзошгүйг анхааруулж байна. Тус нутагт хүчтэй аадар бороо үргэлжлэн орж байгаа бөгөөд хэдэн мянган өрх орох оронгүй болоод байгаа аж. Эрх баригчдын мэдээллээр Кенчо Шача Гозди мужид аврах албаныхан томоохон бүрэлдэхүүнтэй ажиллаж байгаа ч нөхцөл байдал хүнд, сураггүй бологсдын тоо өндөр байна.

Ташрамд дурдахад, хамгийн сүүлд Этиопод 2016 онд их хэмжээний бороо орж, үерлэсний улмаас Волайта хот сүйдэж, 41 хүн амиа алдаж байсан бөгөөд энэ удаагийн үер, хөрсний гулгалт тус улсын түүхэн дэх хамгийн олон хүн амиа алдсан байгалийн гамшиг болж байгаа гэнэ.