Гадаад улсын иргэн O.Sh-ийн Сүхбаатарын талбай дээр Чингис хааны хөшөө рүү заан, доромжилсон утгатай үг хэлж байгаа дүрс бичлэг цахим сүлжээнд түгсэн. Тодруулбал, O.Sh өөрийн албан ёсны тикток хуудсанд нийтэлсэн дүрс бичлэгтээ “Би Монголд ирээд байна. Энэ залууг харахын тулд шүү дээ” гээд Чингис хааны хөшөө рүү зааж “Чи өвөг дээдэст минь яаж хандаж байсан шиг би одоо чиний үр хойчид тэгж хандах болно” гэсэн байдаг. Олон нийтийн сүлжээгээр цацагдаад буй уг дүрс бичлэгтэй холбогдуулан O.Sh-ийг Зөрчлийн тухай хуулийн 5.2 дугаар зүйл буюу танхайрах зөрчил гаргасан байж болзошгүй гэж үзэн цагдаагийн байгууллагаас шалгаж эхлээд буй.

                                Тэгвэл үүнтэй холбоотойгоор гадаадын иргэн O.Sh өөрийн тиктокдоо уучлалт хүссэн бичлэг оруулжээ. Тэрбээр “Чингис хааныг доромжилсон утгатай бичлэг хийсэн уучлалт хүсэж байна. Надад үнэндээ тийм санаа байгаагүй. Муу санаа байхгүй. Би өөрөө комедиан хүн л дээ. Тийм учраас заримдаа жаахан сахилгагүйтдэг. Үнэн би Чингис хааныг хүндэлдэг. Түүний томоохон шүтэн бишрэгч. Багадаа Чингис хааны тухай олон ном, зохиол уншиж байсан. Монголд ирсэн шалтгаан минь Бурхан Халдун ууланд очих, хурдан морины уралдаан, монгол үндэсний хоол, өв соёлыг харах. Гэхдээ сахилгагүйтгэж Чингис хааныг доромжилсон бичлэг хийсэн хариуцлага хүлээнэ” гэсэн байна.

Ташрамд дурдахад, гадаадын иргэн O.Sh тикток сүлжээнд идэвхтэй бичлэг хийдэг тиктокер бөгөөд түүний “blasiantw” нэртэй хуудас 479 мянган дагагчтай аж.