Саудын Арабт хэт халж, өдөрт 50 гаруй хэм хүрч халж байгаагийн улмаас хаж мөргөл үйлдэж байсан 1300 гаруй хүн амиа алджээ. Тодруулбал, Саудын Арабт шашны хаж мөргөлийн сар эхлээд сар гаруйн хугацаа өнгөрч буй. Хаж мөргөлийн сар эхэлсэн холбоотойгоор Саудын Араб, Ариун Мекка хотод олон улсаас жуулчид очиж, энэ жил 1.8 сая хүн хаж мөргөл үйлдэж байгаа гэх мэдээлэл бий. Тэгвэл хаж мөргөлийн үеэр Саудын Арабт хэт халсны улмаас 1300 гаруй хүн амиа алдаад байгаа талаар тус улсын Эрүүл мэндийн яамнаас мэдээлжээ. Тус яамны мэдээллээр хаж мөргөлийн үеэр 44 болон түүнээс дээш хэм, зарим үед 52 хэм хүрч халж байгаа бөгөөд нас барагсад урьдчилан бэлтгэлээ хангаагүй, архаг өвчинтэй, өндөр настай хүмүүс байсан гэнэ.

Хаж мөргөл гэдэг нь Саудын Арабын "Ариун хот" гэгддэг Мекка хотод жил болдог исламын шашны мөргөл хийх зан үйл аж. Уг мөргөл нь бие бялдар, санхүүгийн чадамжтай исламын шашинтнуудын заавал биелүүлэх ёстой үүрэг бөгөөд тухайн шашны тооллоор Зул-Хижа сард болдог мөргөл юм байна.