Өмнөд Америкт орших Бүгд Найрамдах Эквадор Улс даяар эрчим хүчгүй болжээ. Тодруулбал, нийслэл Кито хотоос эхэлсэн цахилгааны хомстолоос үүдэн метро, гэрлэн дохио зэрэг нийтийн үйлчилгээний хэрэгсэл ажиллагаагүй болсноор орон даяар эмх замбараагүй байдал үүссэн байна. Одоогийн байдлаар Эквадорын хилийн бүсийн Колумбиас эрчим хүчээ авдаг ганц хот цахилгаантай байгаа бөгөөд эрх баригчид эрчим хүчний асуудлыг аль болох хурдан шийдвэрлэхээ мэдэгдээд байгаа аж.

Эквадорын хувьд сүүлийн жилүүдэд эрчим хүчний салбарт оруулах хөрөнгө оруулалтаа огцом багасгасан. Улмаар өнгөрсөн дөрөвдүгээр сараас эхлэн зарим хотод хэсэгчилсэн цахилгаан хязгаарлалт хийж байсан ч өнгөрсөн жилд хөрөнгө оруулалтаа бүрэн зогсоосон нь эрчим хүчний хямралд өртөх шалтгаан болж, орон даяар цахилгаангүй болоход хүргэсэн гэнэ.