Дэлхийд эдийн засаг, аж үйлдвэрлэлээ тэргүүлдэг долоон орны нэгдэл буюу “Их долоо”-гийн бүлгийн дээд хэмжээний уулзалт энэ сарын сүүлчээр Италид болно. Тэгвэл Украинд дэмжлэг үзүүлж, Оросын армийн хүчийг сулруулах “амлалт” өгөөд буй “Их долоо” дээд хэмжээний уулзалтаасаа өмнө ОХУ-ын эсрэг хориг арга хэмжээ авчээ.

                          Тодруулбал, өчигдөр АНУ-ын талаас ОХУ-ын эсрэг санхүүгийн дэд бүтэц рүү нь чиглэсэн хориг арга хэмжээ авч буй талаараа мэдээлсэн. Харин өнөөдөр буюу зургадугаар сарын 13-ны өдөр Москвагийн бирж ам.доллар, еврогийн арилжаагаа бүрэн зогсоож байгаа тухай мэдэгджээ. Гаднын хэвлэлүүд Оросын эсрэг авсан хориг арга хэмжээг ам.доллар, еврогоор дамжуулан ОХУ-аас орж, гарах мөнгөний урсгалыг зогсоох зорилготойг онцолж байгаа бөгөөд Москвагийн биржид олон улсад өргөнөөр хэрэглэгддэг хоёр валют арилжахаа больсоноор дайны санхүүжилтэд ч том нөлөө үзүүлэх гэнэ.