“Youtube” хуудаст хошин бичлэг хийдгээрээ алдартай Киприйн Youtuber “Fidias” буюу Фидиас Панайотоу Европын парламентын гишүүнээр сонгогджээ.

                                 Тодруулбал, өдгөө 24 настай Youtuber Фидиас Панайотоу өнгөрсөн долоо хоногийн сүүлчээр Кипрт болсон Евро парламентын сонгуульд нэр дэвшиж, 19.4 хувийн саналаар гуравт бичигдэн Европын парламентын гишүүнээр сонгогдсон байна. Тэрбээр сонгуульд ялж, гишүүнээр сонгогдсон талаараа “Үнэхээр цочирдом, гайхалтай зүйл болж өнгөрлөө. Ийм зүйл болно гэж төсөөлөөгүй байсан. Гэхдээ миний Европын парламентын гишүүнээр сонгогдсон нь намууд арга барилаа орчин үеийн болгож, ард түмнийхээ үгийг сонсох шаардлагатай гэдгийг харуулж байна” хэмээн хэвлэлд яриа өгчээ.

“Youtube” хуудас 2.6 сая дагагчтай Youtuber “Fidias” олон нийтийн мэдээллийн хэрэгслээр “Элон Маск зэрэг 100 алдартныг тэвэрсэн нь”, “Авсан дотор долоо хоног” зэрэг сонирхолтой контент түгээдгээрээ алдартай. Мөн тэрбээр хэдий Европын парламентын гишүүнээр сонгогдсон ч “Youtube” хуудаст үргэлжлүүлэн бичлэг, контент оруулж байх тухайгаа мэдэгдсэн байна.