Израилын танкууд Газын зурвасын стратегийн чухал ач холбогдол бүхий Рафах хот руу орсон талаар олон улсын хэвлэлүүд мэдээлжээ. Тодруулбал, хүний эрхийн байгууллагын эх сурвалжууд “Reuters” агентлагт мэдээлснээр Израилын армийн танкууд Рафах хотын зүүн хэсгийн Салах ад-Дины замаар Бразил, Жнейна дүүрэг руу орсон байна. “ХАМАС”-ын талаас агаарын дайралтаар Израилын армийн довтолгооны нэгжийг онож, зарим цэргийг устгаж, шархдуулсан гэж мэдээлээд байгаа ч Израилын Батлан хамгаалах яамнаас ямар нэгэн мэдэгдэл хийгээгүй байгаа аж.

Ташрамд дурдахад, “ХАМАС”, Израилын дайн эхэлснээс хойш Израилд цэргийн хангамж, зэвсэг, сум зэрэг нийлүүлж байсан АНУ-ын Ерөнхийлөгч Жо Байден “Израилын арми Газын зурвасын Рафах хот руу хуурай замын томоохон довтолгоо хийвэл АНУ зэвсгийн нийлүүлэлтээ зогсоох болно” хэмээн өнгөрсөн долоо хоногт мэдэгдсэн билээ.