Бүгд Найрамдах Франц Улсын Ерөнхийлөгч Эммануэль Макрон БНХАУ-ын дарга Ши Жиньпинтэй хамтарсан хэвлэлийн хурал хийх үедээ ОХУ, Украины дайн болон Францын тусламжийн талаар байр сууриа илэрхийлжээ. Тухайлбал, Ерөнхийлөгч Э.Макрон “Европын холбооны орнууд шаардлагатай бол Украиныг дэмжихэд бэлэн. Гэхдээ Франц Улс ОХУ эсвэл Оросын ард түмэнтэй дайтахгүй” хэмээн мэдэгдсэн байна.

                             Зүүн Европт дайн эхэлснээс хойш Францын тал Украин руу цэргээ оруулж болзошгүй талаар удаа дараа мэдээлэл хийж, ОХУ-д шахалт үзүүлж байгаа. Гэсэн ч Францын эрх баригчдын армийн цэргүүдээ Украин руу оруулах шийдвэр одоог хүртэл шийдэгдээгүй байгаатай зэрэгцэн тус улсын Ерөнхийлөгч “ОХУ-тай дайтахгүй” гэдгээ мэдэгдэв. Харин Францын Légion étrangère буюу легионы армийн 100 орчим цэрэг Украины 54 дүгээр бригадыг дэмжих зорилгоор Славянскт байрлуулаад байгаа гэх мэдээлэл олон улсын хэвлэлүүдээр түгээд байгаа юм.