Бүгд Найрамдах Франц Улсаас Украинд цэргийн тусламж үзүүлэх зорилгоор 1500 орчим легионы цэрэг илгээхээр төлөвлөж буйгаа оны эхэнд мэдэгдсэн. Тэгвэл Францын Légion étrangère буюу легионы армийн эхний ээлжийн цэргүүд Украин руу нэвтэрч эхэлсэн талаар "Asia Times" сонин мэдээлжээ. Тодруулбал, өнгөрсөн амралтын өдрүүдээр Францын легионы арми 1500 цэргийн эхний ээлж буюу 100 орчим цэргийг албан ёсоор Украин руу илгээсэн бөгөөд легионы цэргүүдийг Украины 54 дүгээр бригадыг дэмжих зорилгоор Славянскт байрлуулаад буй гэх мэдээлэл байна.

                                Харин ОХУ, Украины дайн эхэлснээс хойш Францын тал цэргүүдээ оруулна хэмээн мэдэгдэж, Москвад анхааруулаад байсан ч үндэсний армийн цэргүүдээсээ Украин руу илгээх асуудал одоог хүртэлх тодорхой шийдэлд хүрээгүй байгаа аж. Түүнчлэн АНУ-ын Төлөөлөгчдийн танхим  Украины дайнд 61 тэрбум ам.долларын цэргийн багц тусламж олгохоор шийдвэрлэж, тусламжийг Украин руу илгээж эхлээд буй. Гэсэн ч “ОХУ-тай тэмцэж буй энэ дайнд АНУ-ын тусламж хаана ч хүрэхгүй, цэргийн хүч дутаж байгаа” талаар Украины тал мэдээлээд байгаа юм байна.