Ираны тал өнгөрсөн амралтын өдөр Израилын хотууд руу дунд тусгалын пуужин, баллистик пуужин харваж, бөмбөг хаягч дроноор агаарын дайралт үзүүлсэн. Гэнэтийн дайралтын эсрэг Израил АНУ, Их Британи, Йордан, Саудын Арабын нисэх хүчин болон агаарын довтолгооноос хамгаалах системийн тусламжтайгаар хохирлыг хэмжээг бууруулсан байдаг. Хэдий Ираны тал агаарын довтолгоогоор Сири дэх консулын газар бөмбөгдөлтөд өртсөн дайралтын “өшөө”-г дуусгаж байгаа гэж мэдэгдсэн ч Израил ямар хариу өгөх нь олон улсын анхаарлыг татаж буй.

                          Тэгвэл Израилын Засгийн газрын Дайны хороо өнөөдөр Ираны гэнэтийн халдлагын эсрэг ямар хариу арга хэмжээ авч, хэрэгжүүлэх тухай хэлэлцэж эхэлжээ. Израилын Дайны хороон хурлын тухай мэдэгдэл бага байгаа бөгөөд олон улсын хэвлэлүүд ижил хэмжээний хариу цохилт өгч, Ираны Хувьсгалт Гвардын цэргийн бааз, сургалтын төвүүдийг бөмбөгдөж болзошгүй гэсэн таамаг гаргаад байна.