Казахстаны Эдийн засгийн сайд асан Куандык Бишимбаев нь гэр бүлийн хүнээ хэрцгийгээр зодож хөнөөсөн хэрэгт холбогдох шүүх хурал 16 дахь өдрөө үргэлжилж байна.

Тодруулбал, Казахстаны Эдийн засгийн сайд асан Куандык Бишимбаевын эхнэр Салтанат Нукенова өнгөрсөн 2023 оны арваннэгдүгээр сард нөхрийнхөө төрлийн эзэмшлийн ресторанд нас барсан байдалтай олдсон. Шүүх шинжилгээгээр талийгаач бие, нүүрэн дээрээ олон тооны хөхрөлт, няцралттай байсан бөгөөд тархины хүнд гэмтлийн улмаас амиа алдсан болохыг тогтоосон. Улмаар Салтанат Нукеновагийн амиа алдсан хэрэгтэй холбогдуулан түүний нөхөр Куандик Бишимбаевын сэжигтнээр татаж шалгаж эхэлсэн бөгөөд түүнд холбогдох шүүх хурал дээр эхнэрийнх нь амиа алдсан рестораны хяналтын камерын бичлэг олон нийтэд цацагдсанаар эл хэргийг Казахстан даяар төдийгүй дэлхий дахин анхаарч байна.

                           Шүүх хурал дээр дэлгэгдсэн хяналтын камерын бичлэгт Куандык Бишимбаев нь эхнэрийнхээ толгой, нүүрэн хэсэг рүү цохиж, толгой, бие рүү өшиглөж, үснээс нь зулгааж байгааг харуулсан. Тэгвэл шинэ мэдээллээр шүүх хурлын үеэр талийгаач Салтанат Нукеновагийн ээж Жумагул Нукева хүн амины хэрэгт буруутгагдан шалгагдаж буй Казахстаны сайд асан Куандык Бишимбаевыг “Өмнө нь удаа дараа эхнэр, хүүхдүүдээ хүчирхийлдэг байсан” талаар мэдээлсэн байна. Үүнтэй холбоотойгоор яллагдагч өмнө нь эхнэр, хүүхдүүдээ удаа дараа хүчирхийлж байсныг Мөрдөн байцаах албанаас шалгахаар болсон талаар Казахстаны Дотоод хэргийн дэд сайд мэдэгджээ. Эхнэрээ хэрцгийгээр зодож хөнөөсөн Казахстаны Эдийн засгийн сайд асан Куандык Бишибаевт прокуророос 20 жилийн хорих ял төлөвлөөд байгаа аж. Харин уг хэрэгт холбогдох шүүх хурал гуравдугаар сарын 27-ноос өнөөдрийг хүртэл үргэлжилж байгаа ч тодорхой шийдвэр хүрээгүй байна.

Ташрамд дурдахад, Куандык Бишимбаев нь 2017 онд авлига, хээл хахуулийн хэрэгт холбогдож 10 жилийн хорих ял сонсож байжээ. Гэсэн ч хорих ялаа эдэлж эхлээд удаагүй байхдаа өршөөлд хамрагдаж, суллагдсан нэгэн аж.