Японы Сүмогийн холбооноос Хакүхо М.Даваажаргалыг Миягино дэвжээг хааж, бөхчүүдийг нь Исэгахама дэвжээ рүү шилжүүлэх шийдвэр гаргажээ. Тодруулбал, Хокүсэйхо А.Даваанинж дэвжээнийхээ бөхчүүдийг удаа дараа дээрэлхэж, хүчирхийлж байсантай холбоотойгоор Миягино дэвжээг хаах шийдвэр гаргасан тухай Японы хэвлэлүүд мэдээлж байсан. Сүмогийн холбооноос Миягино дэвжээг хаах эсэх асуудлыг мэргэжлийн сүмогийн томоохон дэвжээнүүдийн нэг Исэгахамад даалгасан бөгөөд тус дэвжээ Миягиног хаах шийдвэр гаргасныг Сүмогийн холбооны захирлуудын зөвлөл хуралдаж баталсан байна. Улмаар Хакүхо М.Даваажаргалын Миягино дэвжээг албан ёсоор хааж, бөхчүүдийг нь Исэгахама дэвжээ рүү шилжүүлэх шийдвэрийг эцсийн байдлаар гаргаад байгаа аж.

                     Хокүсэйхо А.Даваанинжийн холбогдсон хэргийг эргэн сануулбал, өнгөрсөн хоёрдугаар сарын дундуур Миягино дэвжээнээс мэдэгдэл хийж, түүнийг хаврын башёд оролцох боломжгүй болсон талаар мэдээлснээр эхэлсэн. Харин тус мэдэгдлээс хойш Хокүсэйхо дэвжээний бөхчүүдээ дээрэлхэж, хүчирхийлдэг байсан тухай мэдээлэл гарч эхэлсэн бөгөөд эхэндээ сүмо сонирхогчид хэвлэлийн дайралт гэж үзэж байсан ч Хокүсэйхо өөрөө мэдэгдэл хийн уучлалт хүсэж, зодог тайлах болсноо мэдэгдсэн. Шалгалтаар Хокүсэйхо А.Даваанинж нь дэвжээнийхээ залуу бөхчүүдийг удаа дараа зодож, хүчирхийлдэг, шүүрний ишээр нүүр, нуруу, бөгс, эмзэг эрхтэн рүү цохидог, угаалгын өрөөнд түгжиж, цавуу, шавж устгадаг бодис цацдаг байсан нь тогтоогдсон байна. Мөн уг асуудалтай холбоотойгоор Сүмогийн холбооноос Хокүсэйхог зодог тайлуулж, багш Хакүхо М.Даваажаргалыг нь шавиа удирдан чиглүүлж чадаагүй гэх үндэслэлээр буруутгаж, цалинг нь хасаж, хоёр зиндаа бууруулан хариуцлага ногдуулаад байсан юм.

Эх сурвалж: Kyodo News