НҮБ-ын Аюулгүй байдлын зөвлөлийн хуралдаанаар Газын зурваст нэн даруй гал зогсоохыг уриалсан тогтоол баталжээ. Тодруулбал, НҮБ-ын Аюулгүй байдлын зөвлөл өчигдөр хуралдаж, дээрх шийдвэрийг гаргасан бөгөөд тогтоолд мөргөлдөөний улмаас “ХАМАС”, Израилын талд барьцаалагдсан хүмүүсийг ямар нэгэн болзолгүйгээр суллахыг шаардсан байна. Газын дайн өнгөрсөн аравдугаар сард эхэлсэн. Дайн эхэлсэн цагаас хойш хоёр талтай олон улс гал зогсоох, энхийн гэрээний хэлцэл хийхийг оролдсон ч удаа дараа бүтэлгүйтэж байв. Харин НҮБ-ын Аюулгүй байдлын зөвлөлөөс гаргасан уг шийдвэр Газын нөхцөл байдал хурцадсанаас хойших анхны гал зогсоохыг уриалсан шийдвэр болж байгаа юм.

Түүнчлэн энэ удаагийн НҮБ-ын Аюулгүй байдлын зөвлөлийн хурлаар хэлэлцсэн тогтоолд АНУ-ын талаас хориг тавиагүй нь тогтоол батлагдах гол шалтгаан болсон талаар гаднын хэвлэлүүд онцолжээ.