Японы мэргэжлийн сүмо бөхийн 69 дэх их аварга Хакүхо М.Даваажаргалыг Миягино дэвжээний бөх Хокүсэйхо Э.Даваанинж дэвжээнийхээ бөхчүүдийг удаа дараа дээрэлхэж, хүчирхийлдэг байсан тухай мэдээлэл гарч, багш, шавь хоёрт хариуцлага ногдуулах болсон талаар Сүмо бөхийн холбооноос мэдэгдээд байсан. Эхний ээлжид, Хокүсэйхо Э.Даваанинжийг зодог тайлуулж, Хакүхо М.Даваажаргалыг шавиа бэлтгэж, чиглүүлж чадаагүй гэх шалтгаанаар хоёр зиндаа бууруулах шийдвэр гаргаад байсан ч өнгөрсөн өдөр Сүмо бөхийн холбооноос мэдэгдэл хийж, Хакүхогийн Миягино дэвжээг хаахаар шийдвэрлэсэн талаар орон нутгийн "Nikkan Sports" сайт мэдээлжээ. Тодруулбал, "Nikkan Sports" сайтын мэдээлснээр энэ сарын 7-ны өдөр Исэгахама Ичимон дэвжээний гишүүд хуралдаж, Хакүхогийн Миягино дэвжээг хаах асуудлаар хэлэлцэж, санал хураасны дүнд уг шийдвэрийг гаргасан аж.

Хакүхогийн зиндааг бууруулсантай холбоотойгоор дэвжээгээ удирдах боломжгүй болж, түүний оронд Тамагаки Миягино дэвжээг удирдаж, хару башёд оролцох мэдээлэл цацагдаад байсан ч Сүмо бөхийн холбооноос дэвжээг хаах шийдвэр гаргасан байна.