БНАСАУ өнгөрсөн оны арваннэгдүгээр сард өмнө нь хоёр ч удаа туршиж, бүтэлгүйтэж байсан тагнуулын хиймэл дагуулаа хөөргөсөн тухай тус улсын төрийн хэвлэл мэдээлж байв. Харин тагнуулын хиймэл дагуул хөөрснөөс хойш холбоогүй болсон, бүтэлгүйтсэн гэх мэдээлэл гарч байгаатай холбоотойгоор Хойд Солонгосын албаныхан тагнуулын хиймэл дагуул тойрог зам руу амжилттай орсон, хянаж байгаа талаараа мэдэгдсэн байна.

                      Тухайлбал, өнгөрсөн арваннэгдүгээр сард Хойд Солонгос “Маллигёнг-1” нэртэй тагнуулын хиймэл дагуул хөөргөсөн. Хөөргөх үедээ л Ази, Номхон далайн бүс нутгийн аюулгүй байдалд заналхийлсэн хэмээн шүүмжлүүлж байсан тагнуулын хиймэл дагуулыг бие даасан сансрын радио байршил тогтоож илрүүлж чадаагүй бөгөөд хиймэл дагуул “сураггүй болсон” талаар хэвлэлүүд мэдээлж байсан. Тэгвэл үүнтэй холбоотойгоор Хойд Солонгосын төрийн хэвлэл тагнуулын хиймэл дагуул амжилттай тойрог замд орсныг зарласан бөгөөд бүрэн хянаж, удирдаж байгаа тухай мэдэгджээ. Харин хэзээ, хаана, хэрхэн орсон болон бусад дэлгэрэнгүй мэдээлэл өгөөгүй байна.