Оросын сөрөг хүчний удирдагч Алексей Навальный нас барсан тухай Оросын шүүхийн байгууллагаас мэдээлжээ. Тодруулбал, шүүхийн байгууллагын мэдээлснээр А.Навальныйгийн биед гэнэт муудаж ухаан алдсан бөгөөд түүнийг эмнэлэг рүү шилжүүлж, цаг гаруйн хугацаанд сэргээн амьдруулах гэж оролдсон ч сэргэлгүй амиа алдсан байна.

                     2022 оны гуравдугаар сард “ОХУ-ын Ерөнхийлөгч Владимир Путиныг хордуулахыг оролдсон” гэх үндэслэлээр А.Навальныйд есөн жилийн хорих ял оноосон. Түүнийг баривчилснаас хойш Москвагаас 200 км зайд байрладаг хорих ангид хоёр сарын турш хорьж, дараа нь хоригдлуудаа эрүүдэн шүүж, тамладаг муу нэрээрээ алдартай орон нутагт оршдог гянданд шилжүүлсэн хорьсон талаар хүний эрхийн байгууллагууд мэдээлж байсан. Сөрөг хүчний удирдагч хорих ял сонсож, гянданд ялаа эдэлж байсан шоронгоос идэвхтэй захидал бичиж, Ерөнхийлөгч Владимир Путины үйлдэл, ОХУ, Украины дайныг шүүмжилдэг байв. Тэгвэл А.Навальныйг нас барсантай холбоотой мэдээллээр дэлхийн удирдагчид ОХУ-ын төрийн тэргүүний чанга дэглэмийг буруушаасан мэдэгдэл хийж эхэлжээ.

Тухайлбал, АНУ-ын Төрийн нарийн бичгийн дарга Энтони Блинкен “Орос А.Навальныйгийн үхэлд хариуцлага хүлээх ёстой” хэмээсэн бол ОХУ-тай мөргөлдөж байгаа Украины төрийн тэргүүн ч үүнтэй ижил мэдэгдэл хийжээ. Мөн сөрөг хүчний удирдагч А.Навальныйгий гэргий Юлия Навальный “Владимир Путин болон түүний Засгийн газрыг нөхрийнхөө үхэлд шүүх болно” гэж мэдэгдээд байгаа аж.

                  Түүнчлэн Оросын сөрөг хүчний удирдагч Алексей Навальный амиа алдсантай холбоотойгоор ОХУ-ын Москва, Мурманск, Санкт-Петербург, Нижний Новгород зэрэг хотод эсэргүүцлийн жагсаал болж байгаа бөгөөд Оросын хүчний байгууллагууд жагсаалд оролцсон 100 гаруй хүнийг баривчлаад байгаа юм байна.