Газар дундын тэнгист амиа алдсан иргэдийн талаар Ромд болсон Итали-Африкийн дээд хэмжээний уулзалтын үеэр Олон улсын цагаачлалын байгууллагаас мэдээллээ. Тухайлбал, 2024 он гарснаас хойш Газар дундын тэнгист 100 гаруй цагаач амиа алдаж, сураггүй болоод байгаа аж. Түүнчлэн нас барагсдын тоо өнгөрсөн оны мөн үеэс хоёр дахин өссөн үзүүлэлттэй байгаа бөгөөд цагаачлалын байгууллага Газар дундын тэнгисийн гарц аюулын хэмжээнд яригдах болсныг онцолсон байна.

Мөн Олон улсын цагаачлалын байгууллагын мэдээллээр өнгөрсөн 2023 онд Газар дундын тэнгист 3041 цагаач амиа алдаж, сураггүй болсон бол 2022 онд 2411 цагаач амиа алдсан аж. Улмаар 2014 оноос хойш Газар дундын тэнгист амиа алдсан, сураггүй болсон цагаачдын тоо 28 мянгад хүрч, анхаарал тавих асуудал болсон талаар цагаачлалын байгууллага мэдээлжээ.