Энэ өдөр буюу арваннэгдүгээр сарын 6-нд дэлхийн түүхэнд юу өрнөж байсныг хүргэж байна.

САГСАН БӨМБӨГИЙГ ҮҮСГЭСЭН ЖЕЙМС НЕЙСМИТ МЭНДЭЛЖЭЭ

           1861 оны энэ өдөр Канад гаралтай Америкийн эмч, багш мэргэжилтэй Жеймс Нейсмит мэндэлж байсан байна. Тэрээр америкийн үндэсний спортын нэг болох сагсан бөмбөгийн спортыг үүсгэж, үндсэн дүрмүүдийг нь зохиож байсан хүн юм.

АНУ-ЫН ЕРӨНХИЙЛӨГЧ НАР СОНГОГДОЖ БАЙЖЭЭ

        1860 оны энэ өдөр 16 дахь ерөнхийлөгч Авраам Линкольн, 1956 оны энэ өдөр 34 дэх ерөнхийлөгч Дуайт Эйзенхауэр, 1984 оны энэ өдөр 40 дэх ерөнхийлөгч Рональд Рейган, харин 2012 оны энэ өдөр 44 дэх ерөнхийлөгч Барак Обама нар сонгуульд ялалт байгуулан, төрийн тэргүүнээр сонгогдож байсан байна.

АНУ ХАМГИЙН ТОМ ХЭМЖЭЭТЭЙ УСТӨРӨГЧИЙН БӨМБӨГИЙГ ГАЗАР ДООР ТУРШЖЭЭ

        1971 оны энэ өдөр АНУ-ын Цөмийн энергийн комиссын зүгээс Канникин хэмээн нэрлэсэн устөрөгчийн бөмбөгийг газар доор амжилттай туршиж байсан байна. Алеутын арлуудад туршсан энэхүү бөмбөгийг тус улсын түүхэн дэх хамгийн том хэмжээтэй устөрөгчийн бөмбөг байсан гэж үздэг юм.

ӨНӨӨДӨР ДОМИНИКАН УЛСЫН ҮНДСЭН ХУУЛИЙН ӨДӨР ТОХИОЖ БАЙНА

     Өнөөдөр Доминикан улсын Үндсэн хуулийн өдөр тохиож байна. Тус улс 1844 онд тусгаар тогтнолоо зарласнаас хойш нийт 39 удаа Үндсэн хуулиа шинэчлэн батлаж байсан бөгөөд хамгийн сүүлд 2015 оны 6 дугаар сарын 13-нд шинэ Үндсэн хуулиа батласан юм.