Палестины “ХАМАС” нэртэй террорист байгууллага Израилын хотуудад гэнэтийн цохилт өгч, иргэдийн барьцаалаад буй. Үүний эсрэг Израилын арми Газын зурвас руу хэд хэдэн томоохон цохилт өгөөд байгаа бөгөөд хоёр талын мөргөлдөөнд амиа алдагсдын тоо хэдийнэ 1000 даваад байгаа юм.

Тэгвэл шинэ мэдээллээр Палестины Ерөнхийлөгч Махмуд Аббас ойрын хугацаанд ОХУ-д айлчилж, Ерөнхийлөгч Владимир Путинтэй уулзах тохироонд хүрээд байгаа талаар Москвад суух Палестины Элчин сайд Абдель Хафиз мэдээлжээ. Айлчлалын товыг удахгүй Кремлиэс албан ёсоор мэдэгдэх бөгөөд Палестины Ерөнхийлөгч тус айлчлалаараа цэрэг, зэвсгийн тусламж хүсэж болзошгүй байгааг олон улсын хэвлэлүүд онцолж байна.

                    Палестины газар нутгийг Ерөнхийлөгч Махмуд Аббасын засаг захиргаа болон Газын зурвасыг удирддаг “ХАМАС” бүлэглэл хуваан захирч байгаа. Харин сүүлийн үед “ХАМАС” террорист байгууллагын хүч зузаарч, Ерөнхийлөгчийн засаг захиргаа хяналт тогтоож чадахгүй болсны улмаас тус улсын төрийн тэргүүн ийн ОХУ руу айлчилж цэргийн хүч хүсэхээр зэхэж байгаа аж.