Палестины “Хамас” нэртэй террорист байгууллага өнгөрсөн шөнө Израилын хэд хэдэн хот руу пуужин харваж, агаар, газар, усан замаар зэрэг цохилт өгчээ. “Хамас” бүлэглэлийн гэнэтийн цохилтын улмаас Израилын 250 хүн амиа алдаж, 100 орчим хүн барьцаалагдаад байгаа талаар АНУ дахь Израилын Элчин сайдын яамнаас мэдээлсэн байна.

Одоогоос хоёр жилийн өмнө Палестин, Израилын дундах маргаан хурцадмал байдалд шилжиж, хоёр орон Газын зурваст 10 гаруй хоног мөргөлдсөн. 500 гаруй хүн амиа алдаж, 2000 орчим хүн бэртэж, гэмтсэн Газын зурвасын мөргөлдөөний дараа хоёр тал энхийн хэлэлцээнд хүрч, гарын үсэг зурснаар Израилын тал Газын зурвасаас цэргээ татсан байдаг. Тэгвэл Палестины террорист байгууллагын гэнэтийн довтолгоог Израилын Ерөнхий сайд Бенжамин Нетаньяху “Дайн зарласан үйлдэл боллоо” гэж мэдэгдээд байна.

                         Израилын Ерөнхий сайд тус мэдээллээрээ Газын зурваст оршин суудаг израилчуудыг нэн даруй зурвасаас гарахыг уриалсан. Тэгвэл Ерөнхий сайд Бенжамин Нетаньяхугийн мэдэгдлийн дараа Израилын тал Газын зурвас руу цохилт өгсөн талаар “CNN” агентлаг мэдээлжээ. Израилын Газын зурваст өгсөн цохилтын улмаас 200 орчим хүн амиа алдсан талаар Палестины эрх баригчид мэдэгдээд байна.