Хөлсний цэргийн “Вагнер” бүлгийн удирдагч Евгений Пригожин өнгөрсөн шөнө ОХУ-ын Тверь мужийн нутаг дэвсгэрт явж байгаад онгоцтойгоо осолдож, амиа алдсан талаар олон улсын хэвлэлүүд мэдээлсэн. Талийгаач Е.Пригожинд хүндэтгэл үзүүлж, цэцэг өргөх ёслол Санкт-Петербург хотод төвтэй “Вагнер”-ын байрны гадаа болсон бөгөөд цаг үеийн асуудалтай холбоотойгоор АНУ-ын Ерөнхийлөгч Жо Байден мэдэгдэл хийжээ.

                                 АНУ-ын Ерөнхийлөгч Жо Байден “Яг юу болж өнгөрснийг сайн хэлж мэдэхгүй байна. Гэхдээ гайхахгүй байна. Евгений Пригожиний осолд ОХУ-ын Ерөнхийлөгч Владимир Путин салшгүй холбоотой. Би мэдэхийн ОХУ-д В.Путины оролцоогүй, хоцорч үлдсэн зүйл байдаггүй. Тиймээс өнгөрсөн өдөр болсон осол Владимир Путины “элит”-үүдэд өгсөн сануулга боллоо” гэсэн байна.

Ташрамд дурдахад, Евгений Пригожиний онгоц осолдсоны дараахан ОХУ-ын Ерөнхийлөгч Владимир Путин Москва хотод дэлхийн хоёрдугаар дайны Курскийн тулалдааны ялалтын 80 жилийн ойн баярыг тохиолдуулан үг хэлжээ. Ингэхдээ Евгений Пригожин болон “Вагнер”-ын талаар үг хэлээгүй бөгөөд Укрианд тулалдаж байгаа Оросын армийн цэргүүдэд хандан баяр хүргэсэн аж.